Rusland Issittumi sakkutooqarfiliornialerpoq
Issittumi soqutigisat illersorneqarnissaat kisiat suliassaraa, Ruslandimi sakkutuut naalagaasa ilaat, Ruslandimi nutaarsisassaqartitsivimmut RIA Novostimut oqarpoq.
- Issittumi sakkutooqarfik umiarsuaqassaaq, sakkutuunik Issittumi sakkulersornissamik immikkut sungiusakkanik sakkutooqassaaq, sakkutuut timmisartuinik peqassaaq, soorlu aamma sakkutuut naalagaasa illussaannik peqarumaartoq, sakkutuut naalagaasa ilaat oqarpoq.
Ruslandip Issittumi sakkutooqarfiata akisussaaffigalugit illersussavai assartuineq, aalisarneq, uuliamik gassimillu qalluiviit, nunallu avannamut killeqarfii.
Ruslandimi sakkutuut Issittumi takussaanerulernissaat, Ruslandip præsidentiata Vladimir Putinip siorna decembarimi naalakkiutigaa, sakkutuullu aaqqissuussamik Issittumi 2014 naatinnagu attaveqaqatigiiffeqarnissaat aamma piumasaralugu.