Avataarsualiartaatip qaammat kaajallereerlugu uterpoq

Avataarsualiartaat inuttaqanngitsoq Orion ullut 25-it avataarsuaneereerluni Manerassuarmut Mexicop avataanut sapaammi nunatsinni nalunaaqutaq ualikkut pingasunngulersoq apuuppoq.

Amerikamiut avataarsualiartitsisarfiat NASA taama nalunaaruteqarput.

Avataarsualiartaatip Manerassuarmut apuunnissaanut pilersaarut eqquuppoq sapaammi nunatsinni nalunaaqutaq pingasunut tanneq arfineq pingasunngortoq apuukkami.

Avataarsualiartat Orion avatarsualiartinneqarpoq novembarip ulluisa 16-anni, qaammallu arlaleriarlugu kaajallallugu.

Orionip avataasualiartineqarneranut siunertarineqarpoq, qaammusiartitsisarnerni atortut ajunnginnersut misissorneqassamata.

AAMMA ATUARUK NASA-p avataarsuliartitsiniarnini aappassaa taamaatiinnaraa

Kingullerrmik inunnik qaammammiittoqarpoq ukiut 50-it matuma siorna.

USA avataarsualiartartunik qaammammusiartitsiniarluni pilersaaruteqarpoq.

Avataarsualiartaat Orion ukiuni tullittuni marloriarluni inuttaqarluni qaammammusiartinneqarnissaa pilersaarutaavoq.

Pilersaarutit malillugit Orion 2024-mi inuttaqarluni qaammammut qanillattussaaq kingornalu nunarsuatsinnut uterluni.

Orion ukioq 2025-mi inuttaqarluni qaammammukartinneqarnissaa pilersaarutaavoq.

Inuttaqanngitsumik avataarsualiartitsineq kingulleq sapaammi naammassineqartoq, amerikamiut avataarsualiartitsisarnermik suliniutaanni Artemisimik taaguteqartut siullersaraat. Tassalu avataarsualiartartut qaammammukassapput qaammamilu pisussallutik kingornalu nunarsuatsinnut uterlutik. Inunnik 1970-ikkuni kingullermik qaammammiittoqarpoq.