Rumaaniami qinersinermi pissutsit kusanaalliartorput
Ullumikkummi Rumaaniap præsidenterisaa Traian Basescu kingullermik qineqqusaarnermi nalaani nukappiaqqamik isassisimasutut pisuutinneqarpoq.
Rumaaniap tv-qarfiata ilanngutassiaasa ilaanni præsidentip nukappiaraq isakkaa videoliarineqarsimasoq takuneqarsinnaavoq, tamannali præsidentip sakkortuumik akerlilerpaa:
- Meeqqakka, inuit allat meeraat nuliaraluunniit attortarnikuunngilakka, taamatut Rumaaniap præsidentia Traian Basescu videoliaq takoreerlugulu tv-qarfimmut oqaaseqarpoq. Videoliamimi takuneqarsinnaavoq arnap meeqqani innarluutilik ilungersorluni præsidentinngorniamut ikioqqugaa, kinguninngualu præsidentinngorniap meeraq isakkaa takuneqarsinnaallunittaaq.
Præsidentip videoliaq salloqittaataanerarpaa, præsidentinngorniunnermilu unammillertaasa uukapaatitsiniutaattut taakkartorlugu.
Præsidentinngorniunnerup aappassaaneerneqarnissaa tulliani sapaatiuppat pissaaq, qinigaasussallu suliassai imaannaanngitsuupput, Rumaaniami EU-mi nunat piitsuunerpaat, perulluliorfiunerpaallu ilagaat, IMF-imiillu, tassa nunat siuarsagassat taarsigassarsiniartarfianiittut aningaasat milliardilikkaat Rumaaniap aningaasaqarniarneranut iluarsartuutissatut atugassaagaluit unitsinneqarsimallutik.
