USAmi qinersineq Rufus Giffordip Danmark qimattussanngoramiuk aliasuppoq
Amerikamiut Danmarkimi aallartitaa qasuvoq aamma tupaallaqqavoq, amerikami qinersineq unnuaq naallugu malinnaaffigereerlugu qinersinerup inernera ullaaq paasigamiuk.
- Akunnerit 25-it eqqumavunga.
Amerikamiut Danmarkimi aallartitaat Ruffus Gifford danskit nalunaaqutaat naapertorlugu ullaaq arfineq pingasunut qiteqquttoq taamannak oqarpoq, Københavnimi Hotel Marriotimi ullaakkorsiuutigaluni ataatsimiititsinermi Rufus qaaqqusisuuvoq.
USA-mi qinersinerup inernera tupaallaatigaa:
- Isumaqarpunga tamatta tupaallatsitaalluta, qinersisartut isumasiorneqartarnerini uanga eqqaamasanni aatsaavissuaq isumasiuisimanerit eqquutinngillat, isumaqarpunga tupaallatsinneqarneq pinngitsoortinneqarsinnaanngitsoq, Ruffus Gifford oqarpoq.
Ruffus Gifford tupaallatsinneqarsimagaluarluni nunani allani assingusunik pisoqarnera takusinnaanerarpaa.
- Europami nunani tamani politikikkut avissaartuuttoqarpoq tamanna siusinnerusukkut sivisuumik takusimanngilarput.
- Tuluit Nunaat EU-mit aniniarnerani Brexitimi takuvat, aamma Europami qinersinerit talerperliunerusut sakkortuumik tiguaanerat takusinnaavat, Rufus oqarpoq, nangillunilu;
- USA-mi ippassaq unnukkut aamma tamanna takuat. Tamannalu kingorna aatsaat paasilertarparput.
Avissaartuunneq pinaveersaarniarlugu suleqatigiikkumaarpugut taamallu iliorusuttoqarnera upperaara, Rufus Gifford oqarpoq
Rufus Gifford USA-p Danmarkimi aallartitaatut ukiuni kingullerni sisamani atorfeqarpoq Kalaallit Nunaannullu tikeraartarluni.
Donald Trumpip præsidentinngorneratigut tamanna Kalaallit Nunaannut qanoq kinguneqassanersoq Rufus Giffordip oqaaseqarfiginianngilaa.
Taamaattorli kunngeqarfiup Danmarkip USA-llu ataqatigiinnerat ingerlaannassasoq taassuma qularutiginngilaa.
- USAp kunngeqarfiullu Danmarkip ataqatigiinnerat ingerlaannassaaq kina præsidentiunersoq apeqqutaanani aamma ministeriuneq kinaanersoq apeqqutaanani. Kinguaariinni tamanna ilumoortuuvoq, præsidentip kinaagaluartulluunniit allanngortikkusunnavianngikkaa isumaqarpunga, Rufus Gifford oqarpoq
USAmi qinersinerup kingorna Rufus Giffordip uiatalu Steven DeVincentip Danmark qimattussanngorpaat.
- Tamanna uannut alianarpoq. isumaqarpunga jannuaarip 20-ani aallassalluta. Ullut maaniiffissakka atorluassavakka. - Barack Obamamut ambassadøriussaanga jannuaarip ulluisa 20-ata tungaanut.
- Suliffiup uummatikkut iluunngarlunga nuannarisimasama atorluarnissaa sapinngisara tamaat anguniassavara, USA-p Danmarkimi ambassadøria Rufus Gifford suleqatitsinnit Helle Nørrelund Sørensenimit ullaaq apersorneqarluni taama oqarpoq.