Rubinisiorfiup ingerlaqqissinnaalernera Sermersuup nuannaarutigigaa

Aappaluttumi rubinisiornissamik pilersaarutip aallarteqqineqarnissaa Kommuneqarfik Sermersuumit nuannaarutigineqarpoq.

Piginneqatigiiffiup LNS Greenland Gems A/S-ip, piginneqatigiiffiup True North Gems A/S-ip Aappaluttumi rubinisiornissaanut akuersissutinik arlaqartunik tigusaqarnera qanittukkut nalunaarutigineqarpoq. True North Gems Greenland A/S-ip septembarip aallartisimalaarnerani akiliisinnaajunnaarnerani tamanna pivoq, Aappaluttumilu rubinisiornissamik pilersaarutip maanna aallarteqqinnisssaa kommunimit nuannaarutigineqarpoq:

- Suliniut Kommuneqarfik Sermersuumut kisimi pingaaruteqanngilaq aamma Nunatsinnut tamarmut pingaaruteqarluinnarpoq. pileraarutip ingerlaannarnissaata aamma takutippaa Nunatsinni aatsitassarsiorsinnaanissaq ingerlanneqarluarsinnaasoq. Taamaattumik nuannaarutissaavoq suliniutip ingerlateqqinneqarnissaa qulakkeerneqarmat, Kommuneqarfik Sermersuup borgmesteria Asii Chemnitz Narup, tusagassiuutinut nalunaarummi taama ilaatigut allaaserisaqarpoq.