Rubiinit kusanartut tuniniarneqarsinnaalingajalerput

Qeqertarsuatsiaat eqqaani Kigutilimmi Aappaluttumilu rubiineqassutsimik piaalersinnaanermillu, True North Gems-ip Canadameersup misissuititsinera aamma nunarsuq tamakkerlugu nioqqutissiorniarnera juullilernerani ingerlanneqarsinnaalissaaq.

Misissuinermi ingerlatsisuusup ujarassiuup rubiineqassuseq pitsaalluinnartutut nalilerpaa, naatsorsuutigaalu ukiorpassuarni rubiinimik piiaasoqarsinnaassasoq.

Piiaaneq siulleq 2009-mi aallartissinnaavoq, rubiininillu piiaaneq imminut akilersinnaanersoq, ukiuni marlunni misiligarneqassasoq, ujarassiooq True North Gems-imeersoq William Rohtert oqarpoq.

Rohtert ukiuni 33-ini rubiininik ujaasilluni angalasarsimasoq isumaqarpoq, Aappaluttup Kigutiliullu eqqaani rubiini pitsaalluinnartuusoq, Kalaallit Nunaatalu ukiorpassuarni aningaasarsiutigilluarsinnaagaa.

- Aatsitassaqarnermut pisortaqarfiup qinnuteqarnerput akuerissappagu, juullilernerani Nuummi Københavnimilu misiliutinik tuniniaasinnaassaagut, William Rohtert oqarpoq.

Aatsitassaqarfimmi pisortaqarfimmeersoq, Annette Jørgensen oqarpoq rubiinisiortuneersunik qinnuteqaammik suli tigusaqarsimanatik.