Royal Greenlandip Wilhelmshavenimi suliffissuani tuniniarpaa
Royal Greenlandip aningaasaliinissamut piginneqatigiiffiit marluk - Sahara Investment Group Private Limited aamma Meridian Investment Group Limited - isumaqatigiissuteqarfigigallarsimavaat. Royal Greenlandip Tysklandimi ingerlatsiviata aktiakapitalia tamarmiusoq piginneqatigiiffinnit taakkunannga tiguneqarpat aatsaat inaarutaasumik isumaqatigiissusiortoqassaaq. Qanoq akeqassanersoq paasissutissiissutigineqanngilaq.
Royal Greenland tusagassiorfinnut nalunaaruteqarluni allappoq, Cuxhavenimi nipisat suaannik tunisassiorfiit aammalu poortuutissiorfik tunisinermi ilanngunneqassanngitsut.
Royal Greenlandip pisortaanera Michael Thinghuus naapertorlugu tunisisinnaaneq Royal Greenlandip suliffeqarfittut pilersuinikkut niuernermik aallussaqarnissaanik pingaarnertut anguniagaqarneranut naapertuuppoq, taakkulu pingaarnertut Atlantikup avannaani pisarineqarsinnaasunik Royal Greenlandillu Kalaallit Nunaanni pisaralugillu pisiarisartagaanit tunngaveqarput.
Aammattaaq paasissutissiissutigaa, illua'tungeriit tunisisinnaanermut periarfissanik maanna misissuileruttorput. Illua'tungeriit misissuinerminnut atatillugu Europami niuerfigisartakkanut aalajangersimasunut tuniniaasinnaanissaq taamalu pisiniartigisartakkanut attaveqarluarneq attatiinnarumallugulu nukittorsarniarlugu aammalu Wilhelmshavenimi tunisassiorfimmit tunisassianik pilersuisinnaaneq kiisalu Royal Greenlandip tunisassiaanik tunisaqarsinnaaneq qulakkeerumallugu illua'tungeriit suleqatigiissinnaanermik eqqarsaateqartut. Suliffeqarfiit tuniniaasartut suleqatigiilernissamik isumaqatigiissuteqarfiginiakkat suliffeqarfimmut sulisunik 50-inik ilasiniarput.
Wilhelmshavenimi suliffissuaq Royal Greenlandip 1996-imi pisiarisaa 400-nik sulisoqarpoq siornalu aalisakkanik qaqortunik nerpilinnik tunisassiassanik 58.400 tonsinik tunisassiorluni.
