Royal Greenlandip Upernaviup nunaqarfiini tunisassiorfiit suliniuteqarfigigai
Innaarsunni Aappilattumilu tunisassiornerup annertusinerat pissutigalugu sulisut ilaneqartussanngormata Royal Greenland nunaqarfinni taakkunani sulisut inissaannik sanaartortitsissamaalerpoq.
- Kullorsuarmi Innaarsunnilu maannakorpiaq suliniuteqarpugut. Tasiusami Nutaarmiunilu suliniutit 2018-imi aasaanerani ingerlanneqassapput, Upernavimmi tunisassialerinermi ingerlatsisuugallartoq Knud Mathiesen oqarpoq, nangipporlu:
- Maanna containerit qulit qerititsivittut atugassat Kullorsuarmi ikkussuunneqareersut marsimi innaallagissamut attavilerneqareerunik atuutilissapput. Taamalilluni Kullorsuarmi qerititsivimmiittuutigisinnaasat 200 tonsinik annertusissammata aalisartut tunisisinnaalerulissapput taamatuttaaq siornatigut april tikillugu tunisisinnaasarsimallutik maanna maj ilanngullugu tunisisinnaalissallutik, Royal Greenland nittartakkamini taama allappoq.
Innaarsunni qerititsivinnik nutaanik pilersitsisoqarnerasigut sulisut qulinik ilaqqinneqassasut, Knud Mathiesen oqarpoq.
Nutaarmiuni siornatigut qalerallit ilivitsuutillugit qeritinneqartaraluartut maanna niaquerlugit paperuiarlugillu tunisassiarineqartalernissaannut atatillugu sulisut tallimanik ilaneqassasut, tunisassialerinermi ingerlatsisuugallartoq Knud Mathiesen aamma oqarpoq.
