Angut 41-inik ukiulik Paamiuni Royal Greenlandip raajaleriffiani sulitilluni ippassaq ualikkut ajunaarpoq.
- Angut ataataasoq karsersuarnik marlunnik 800 kilonik oqimaassusilikkuutaanit nanertissimasoq, Paamiuni politiit pisortaat, Hans Peter Olsen, oqaluttuarpoq nangillunilu:
- Raajaleriffiup tunitsivittaani karsersuit raajanut uunneqarsimasunut atorneqartartut ulluni arlalinni uninngasussaanertik peqqutigalugu tallimakkuutaarlugit iikkamut attuutsillugit qaleriiaarneqartarput. Karsit qaleriiaakkat sanileriisillugit iliorarneqartarput.
Truckinik ingerlatsilluni karsersuarnik ippassaq ilioraasoqarpoq. Ingerlatsisup karsersuit tallimat qaleriissimasut piareeramigit saniani allanik ilioraaniartilluni karsi ataaseq naqqup qeqqanut ilereerlugu allamik aallerniartilluni qanngorpallammik tusaalersimavoq. Tunummut qiviarami takuvaa karsit aatsaannguaq qaleriissani uppissimasut, uppinnerannilu angut saneqqullugit ingerlasoq uppiffigineqarsimavoq karsinillu marlunnit niaqqumigut timimigullu eqqorneqarsimalluni, Paamiuni politiit pisortaat Hans Peter Olsen oqaluttuarpoq.
Sulliffinnik nakkutilliisoqarfimmi sulisut sulinermik ajunaarneq ataasinngorpat misissuiffigissavaat.
