Anorersuarnerani ajutumeertoqartoq: Royal Greenlandip qullersaqarfiata qaliarsuata ilaa teqqartoq

Nuummi Royal Greenlandip allaffeqarfiata qaliaa Nuup Aasiaallu akornanni marlunngornermi unnukkut aallartittumik anorersuarujussuarnerata kingunerisaanik ajutumiingaatsiarpoq.
Allaffeqarfiummi qaliarsuata ilaa teqqartoq, politiit marlunngornermi unnukkut ilisimatitsipput.
- Teqqartoqarpoq, taamaammat allaffeqarfiup eqqaaniittunut ulorianarsinnaavoq – taamaammat umiarsuarmiikkaanni assigisaanniikkaanniluunniit isersimaannarnissaq innersuutigaarput. Politiit qatserisartullu piffimmiipput assersuillutillu, politiet facebookimi quppernerminni allapput.
Inunnik ulorianartorsiortoqanngitsoq ajoqusertoqarataannaanissaanillu aarlerinartoqanngitsoq, politiit piffimmut apuukkamik nalilerpaat. Taamaammat apuunnerminniit akunnerit marlungajaat qaangiuttut ingerlaqqipput.
Politiit pigaartuisa pisortaat Jeppe Andsager ullaaq manna taama ilisimatitsivoq.
Teqqartulli umiatsiat angallatillu umiarsualivimmi talinngasut eqqorsimasinnaagaluarai, taanna aamma oqarpoq.
- Taamaammat inuit umiatsiamik talinngasuutillit angallatiminnut alakkaaqqunarput, Jeppe Andsager oqarpoq.
Pisut aaqqikkuminartuusut, Royal Greenland KNR-imut ilisimatitsivoq.
- Salliligaaluit listialuillu pineqarput, ilungersunartumik pisoqarnanilu ajoqusertoqanngilaq. Royal Greenlandimi pisarnitsitut sulivugut, Royal Greenlandip attaveqatigiinnermut pisortaa Merete Lindstrøm oqarpoq.
Illut allat arlallit qaliaat aamma teqqartut
Kapisilinni imiisiveqarfiup qalia aamma tingittoq, tamaanilu umiatsiat ilaat aamma kinngupput. Umiatsialli kinngusut qassiunersut ilisimanngikkini, politiit pigaartuisa pisortaat pingasunngornermi ullaakkkut oqarpoq.
- Qassiunersut qaammarpat misissussavarput. Inunnilli ajoqusertoqarnanilu navianartorsiortoqanngilaq, Jeppe Andsager oqarpoq.
Qasigiannguani illut ilaata qalia aamma tingittoq ajoqusertoqarneranilli nalunaartoqanngitsoq, politiit pigaartuisa pisortaat oqarpoq.