Royal Greenlandip oqaluuserineqarnissaa tallimanngorpamut kinguartinneqarpoq

Inatsisartut siulittaasuata Josef Motzfeldtip ualeq manna nalunaaqutaq 14:27 ataatsimiinneq aallarteqqippaa, pilersaarutaasumit nalunaaquttap akunnerata affangajaanik kingusinnerusumik. Aningaasaqanikkut ajornartooqqasup Royal Greenlandip milliardip affaanik aningaasaliiffigineqarneqarnissaa oqaluuserineqartussaagaluarpoq, aalajangiiffigineqarpallu aningaasaarnermut ataatsimiititaliamut ingerlateqqillugu.

Kisianni taama pisoqanngilaq. Tassami immikkut ittumik ataatsimiinnermi Siumup piumasaraa, Royal Greenland pillugu ataatsimiinneq matoqqanani ammasuussasoq, maanna illuatungiliuttuusut isumaqarmata, isertugassaqanngitsoq.

Siunnersuut taanna naalakkersuisooqatigiit, Inuit Ataqatigiit, Demokraatit Kattusseqatigiit Partiiatalu, isumaqatiginngilaat. Taamaalimmat ataatsimiinneq unitsikkallarneqarpoq, partiit siulittaasui oqaloqatigiissammata.

Ataatsimiinneq aallarteqqimmat naalakkersuisut siulittasuat, Inuit Ataqatigiinneersoq Kuupik Kleist, Inatsisartunut nalunaarpoq, partiit siuluittaasui isumaqatigiittut.

- Naalakkersuisut Inatssiartut Siulittaasoqarfiannut qinnutigaat, Inatsisartut oqaluuserisassaanni immikkoortoq 20-p oqaaluserineqarnissaa Inatsisartut tallimanngornermi juunip 19-ani 2009 ataatsimiinnissaannut kinguartinneqassasoq, Kuupik Kleist oqarpoq.

Taamaalereertoq Siumumeersoq Doris Jakobsen oqaaseqarpoq, paasissutissat amerlanerusut pisariaqartikkitik.

- Suli isumaqartuarsinnarpugut, Royal Greenland pillugu ataatsimiinneq ammaasuusariaqartoq, Doris Jakobsen oqarpoq.

Kuupik Kleist akivoq, Inatsisartut ataatsimiittarfianni matoqaasumik atatsimiittoqarnissaa aalajangiusimagini.

- Taamaanngippat allatut aalajangertariaqassaagut, Kuupik Kleist oqarpoq.

Siumup siulittassua Aleqa Hammond Royal Greenlandimut tunngasumik kingulliulluni oqaasoqarpoq.

- Taama amerlatigisut aningaasaliisutiginiarneqarnerini aammalu Royal Greenlandip siunissaanut aalajagiissulluinnartussami peqataassagutta piumasaraarput, Inatsisartunut ilaasortat tamarmik pasissutissanik pisariaqartitaannik tunineqassasut, Aleqa Hammond oqarpoq.

Tassalu Royal Greenland pillugu oqallinissaq tallimanngorpamut nuunneqarpoq.