Royal Greenlandip nunatta avataaniit sulisussanik tikisitsiniarnera akueriumanngilaa
Ilulissat kommunalbestyrelsiata Royal Greenlandip avataaniit sulisussanik tikisitsisinnaaneranik akuersissummik tunniussereernerata kingorna, Avannaata kommunerujussuassaani ataqatigiissutut misigisimalernissaq malugineqanngitsuulinnguatsiarpoq.
Qasigiannguit borgmesteriat Jess Svane akuersinermut isumaqataanngilluinnarpoq.
Royal Greenlandimi pisortaaneq Flemming Knudsen aperigatsigu, ilumut avataaniit sulisunik tikisitsissanersut akivoq, nunatsinni sulisussanik ujaaseqqaassallutik, sulisussallu 50-it amigaatigineqartut neriuutigaa upernaamut pissarsiarineqarumaartut.
- Qasigiannguani suliffissaaleqisut Ilulissanut nuullutik suliartorusuttut tikilluaqquavut, Flemming Knudsen oqarpoq.
- Qasigiannguami qaleralinnik tunisassiorneq annertusiartorpoq, sulisussallu amerlanerusut atorfissaqartinneqarnerulissallutik, Flemming Knudsen oqarpoq, taanna isumaqarpoq Ilulissani qaleralinnik tunisassiornerup Qasigiannguanut imaaliallaannaq nuunneqarsinnaanera aaqqinneqarsinnaanngitsoq.
Qasigiannguani borgmesterip oqariartuut suli isumaqatigisinnaanngilaa.
Jess Svane oqaloqqissooq
Qasigiannguani borgmesterip tusagassiuutitigut nalunaarummini, Royal Greenlandip avataaniit sulisussanik tikisitsinialersaarnera Naalakkersuisut unitsinniartariaqaraat kaammattuutigaa.
