Royal Greenlandip Kinamiut samminiarpai

Royal Greenland Aasiami - pingaartumik Kinami Japanimilu - tunisassiornerulerusuppoq. Suliffeqarfissuup malugisimavaa nunani taakkunani ukiuni kingullerni tunisaqarnerpaasimalluni, tamaanilu tunisaqarnerpaasinnaalluni Royal Greenlandip maannangaaq takusinnaavaa. Aviisimi Jyllands-Postenimi tamanna allaaserineqarpoq.

- Europamut nioqquteqarneq procentinik sisamanik siorna qaffariartoq, nunarsuup sinneranut nioqquteqarneq pingasoriaammik annertuneruvoq. Tamannalu Aasiami malunnarnerpaavoq, Kina tamaani soqutiginninnersaalluni, pisortaaneq, Mikael Tinghuus, aviisimut oqarpoq.

Suliffeqarfissuaq qalerualinnik aalisakkanillu nunarsuaq tamakkerlugu nioqquteqartarpoq, Europamili niuerfinni anginerni akit pissutigalugit Europamut nioqquteqarneq ilungersunarsinnaavoq, taamaammat Asia pilerinarnersaavoq, Royal Greenlandimit nassuiaapput. Suliffeqarfissuup kaaviiaartitaasa 80 procentii Europamiipput.

Asiamulli tunisineq annertusiartorpoq, Royal Greenlandimiillu oqaatigaat aalisakkanik suliareriikkanik, soorlu Japanimi sushiliornissamut piariikkanik tunisisarnissaq aningaasarsiutigilluarneqarsinnaassasoq. Qaleralinnik raajanillu qalipaajarneqanngitsunik Kinamut tunisarneq aamma akilersinnaassaaq, tamakkumi Kinami suliareqqinneqarsinnaammata, aviisimi Jyllands-Postenimi allapput.



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl