Nunatsinni raajarniutit annerpaartaat tikilluaqquneqarluartoq
Nunatsinni kilisaatit raajarniutit annerpaartaat sananeqarfimminiit tassa Bilbaomiit Spaniamiittumiit Nuummut tikippoq.
Raajarniussuaq Bilbaomiit Savalimmiunukarluni decembarip ulluisa 16-ianni avalappoq. Savalimmiunut decembarip ulluisa 21-anni tikippoq, raajarniussuarmilu inuttat Savalimmiuni juullisiorput.
Raajarniussuaq Avataq Savalimmiuniit Nuummukarluni decembarip ulluisa 28-anni avalappoq.
- Nunap Isua anorersuarmat Ikerasassuakkoorpugut. Ikerasakkoorluta nunaqarfik Aappilattoq avaqqukkatsigu umiatsiaaqqap ingiaqasiuppaatigut, nunamiillu qummoroortartoqarpoq, umiarsuarmi Avatami naalagaq, Tordar Dimon, oqaluttuarpoq.
- Nuanneqaaq, umiarsuartaamillu tikinnitsinni tikilluaqqusaasutut misigisimavugut.
Avataq 30-nik inuttaqarluni siullerpaamik raajarniariartorluni arfininngormat avalappoq.
- Umiarsuarmi atortut aalisarnermi siullermi misilittarneqassammata inuttarpaaluit teknikeriussapput. Umiarsuup atortui misilittarneqareerpata umiarsuarlu sivisunerusumik avalaqqasinnaalerpat 25-nik aalajangersimasunik inuttaqassaanga, Tordar Dimon oqarpoq.
Assi: Royal Greenland/Inuuteq Kriegel
Avataq 25-nik inuttaqartussaq 82,3 miiterisut takitigaaq 18 miiterinillu silissuseqarluni. 2950 kubikmeterinik imartussuseqarpoq, ullormullu raajat 110 tonsit qeritissinnaagai, Johan Berthelsen Royal Greenlandimi imarsiornermut ingerlatsisoq KNR-imut oqaluttuarpoq.
