Royal Greenlandip Glyngøremi nerpileriffia Polenimut nuunneqalerpoq
Royal Greenlandip nerpileriffiata Jyllandip avannaani Glyngøremiittup Royal Greenlandip Koszalinimi Polenimiittumi suliffissuanut 2008-mi februaarimi nuunneqarnissaa pillugu sulisuni isumaqatigiinniarfigilerpai.
Glyngøremi sulisut 130-t missaanniittut suliassat nuunneqarnissaannit eqqorneqartussaasut, suliffissuarmi allanik suliaqalernissaat neqeroorutigineqassaaq, taamaassanngippat suliffissarsiornissaannik ilinniagaqalernissaannilluunniit ikiorniarneqassallutik.
Royal Greenlandimiit nalunaarutigineqarpoq nerpileriffimmi aningaasarsiaritinneqartut nunani allani aningaasarsiaritineqartartunut naleqqiullugit qaffasippallaartut, ingammik nunat EU-mut ilaasortat amerlinerisa kingornagut.
Royal Greenlandimiittaaq nalunaarutigineqarpoq tamanna Glyngøremi suliffissuarmi suliassat ikilisarniarneqarnerannik aallaaveqanngitsoq, akerlianilli tunisassioriaatsinik allanik inerisaanissaq pineqartoq.