Royal Greenland Tysklandimi akissarsitinneqarpoq
Tysklandimi atuagassiarineqartartoq "Fischmagazin" Tysklandimi aalisakkanik tunisassiornermik suliaqartartunit atuarneqarnerpaajusarpoq. Atuagassiaq aaqqissuussamik Hamburgimi ingerlanneqartartumik "Fischwirtschaftsgipfel"-imik taaneqartartumik ukiut tamaasa aaqqissuisuusarpoq, matumani aalisakkanik tunisassiornermik suliaqartartut, aalisartut, amerlasuunngorlugit nioqquteqartartut tunisassianullu tunngasunik sullissisartut kiisalu politikkimut tunngasumik suliaqartartut peqatasorisarlugit. Ukioq manna saqqummiussinerni, oqallinninnerni unnussiuaaqatigiinnermilu inuit 270-it peqataapput.
Unnussiuaaqatigiinnermi peqataasut tamarmik nioqqutissat akissarsitinneqartussatut piukkunneqartut pillugit nalileeqquneqarput, matumanilu Royal Greenlandip tunisassiarisartagai - Kids Ketchup bites aamma Fish bites med ost – nioqqutigineqartartut qerisut akornanni naliliiffigineqarluarnerpaapput.
- Akissarsissutigineqartoq tigullugu taamatuttaaq unammillertivut ajugaaffigalugit nuannivippoq. Nioqqutigisartakkavut fiskenuggetsinik taaneqartartut 2013-imi nioqqutit qerisut akornanni pitsaanerpaatut aalisakkanik tunisassiornermik ilisimasaqarluartunit - 270-it missaannik amerlassuseqartunit - nalilerneqarput. Royal Greenlandimi suleqatinut tamanut "Oscar"-imik akissarsitinneqarnermut piviusunngortitseqataasunut qujangaarpugut… tunisaqarluarnissaq maanna tullernguuppoq, tuniniaanermi pisortaq René Stahlhofen oqarpoq.
