Royal Greenland tunitsivinnik matusinialerpoq

Ilimagisamit saarullikinnerunera, saarullittallu pitsaassutsimikkut appasinnerunerat, aammalu nunarsuarmi saarulliit akiisa appasinnerat pissutaalluni, tunitsiviit matusariaqartut, Royal Greenland ilisimatitsivoq.

Tunitsivinni matuneqartussani, Kangaatsiami Niaqornaarsummi Ikerasaarsummilu, atortut illuutillu Royal Greenlandimit tiguneqarneranit aserfallassimapput, tamannalu suliffeqarfissuarmut Royal Greenlandimut aningaasanik amerlasuunik naleqarsimavoq.

Royal Greenlandip pisortaanerata, Flemming Knudsenip tunitsiviit matusariaqalernerat ajusaarutigaa. Ukiumi naatsorsuiffimmi 2007/2008-mi amigartoorutit ilaat 20 millioni koruunit tunitsivinnit pineqartunit pipput, iliuusissarlu ajuusaarnartoq suliffeqarfissuup aalajangiuttariaqarsimagaa, Flemming Knudsen oqarpoq.

Kangaatsiami nunaqarfiinilu tunitsiviit matuneqarnerisa saniatigut, Arsummi, Qeqertarsuatsiaani Atammimmilu aalisakkanik tunisineq februaarip ulluisa 28-anni unitsinneqassaaq. Taamaattorli nipisat suaannik tunisineq apriilip maajillu qaammataanni ingerlanneqassallutik.

Nuummi Kangaamiunilu Royal Greenlandip tunitsivii ingerlaannassapput.