Royal Greenland sulisunik Kinameersunik tikisitsiniartoq
Royal Greenlandip sulisussanik kinameersunik tikisitsissaguni tikisinneqartut suliffeqarfissuup Maniitsumi, Uummannami Qasigianngusnilu tunisassiorfiutaani sulilissapput, Nunatsinnilu najugaqalissallutik.
- Royal Greenlandip Kinami tuniniaanermut immikkoortortaani sulisoq inunnik 30-nik tunisassiorfinnut suliartorlutik nunatsinnut nuukkusuttunik sulisussarsiorluni aallartereersoq qanimut oqaloqatigisarparput, Royal Greenlandip suliffeqarfissuarmi sulisoqarnermi ingerlatsisua Søren Olsen Damgaard oqarpoq, nangillunilu:
- Sulisut Kinameersut immaqalu nunanit allaneersut 2017-imi aasap ingerlanerani aammalumi ukiut tulliuttut ingerlaneranni amerlineqarnissaat siunertaavoq.
Aamma atuaruk SIK: Sulisussanik tikisitsisoqassanngilaq
Tikisitsineq avaqqunneqarsinnaanngitsoq
Suliffeqarfissuarmi sulisoqarnermut ingerlatsisup aamma oqaatigaa, tunisassiorfinni ulapaarfiusuni aalisakkanik tunisanik tunisassiornerminni ilaatsigut angummassinnaasanngitsut - naak tunisassiassat naammattaraluartut. Taamaammat tikisitsinissaq avaqqunneqarsinnaanngitsoq oqariartuutigineqarluni.
- Sulisussaaleqisarnerput qaangerusullutigu sineriammit ukiuni arlaqartuni iluatsilluartartumik suliartortitsisarpugut. Sulisussaaleqisarnerpulli ukiumiit ukiumut annertusiartuinnartarsimammat sulisussaaleqisarnerput ajoraluartumik qaangivinneq ajorparput.
- Nunami tunisassiorfiutitsinni uteqattaartumik sulisussaaleqisarnerput pissutigalugu sulisussanik nunanit allaneersunik tikisitsisariaqarpugut, Søren Olsen Damgaard oqarpoq.
