Royal Greenland sinneqartoorpoq

Ukiuni tallimani kingullerni Royal Greenland aatsaat taama naatsorsuutitigut angusarissaartigaaq. 2009/2010-mi naatsorsuutinut sanilliullugit 122 millioner koruuninik siuariarpoq.

- Naatsorsuutitigut angusarissaariartorneq iluarisimaarnartorujussuuvoq, aammattaaq eqqarsaatigalugu ukiut marluinnaat matuma siornatigut Royal Greenland akileraarutit ilanngaatigereerlugit 200 mio. koruuningajannik amigartooruteqarmat, Royal Greenlandimi siulersuisut siulittaasuat Niels d Conick-Smith aamma pisortaaneq Mikael Thinghuus nalunaarput.

Namminersorneq junimi 2009-mi eqqunneqarmat siullerpaatut aningaasaliisoqarmat Royal Greenland 250 millioner koruuninik aningaasaliiffigineqarpoq taakkulu qaavisigut 250 millioner koruuninik landskarsimit taarsigassarsisinneqarluni.

Piffissalli ingerlanerani nunarsuarmi niuerfinni akit Royal Greenlandimut iluaqutaasumik allanngoriartorsimapput.

- Niuernermi pitsaanerusunik akigititat Royal Greenlandip tulaassinernut akiliutigisartagaanut sunniuteqarput taakku agguaqatigiissitsilluni 19 %-imik ukiup siulianit qaffasinnerummata, suliffeqarfissuaq nalunaarpoq.

Sulili Royal Greenland 2 milliarder koruuninik akiitsoqarpoq iliuusissatullu pilersaarut Naleraq 2013 naapertorlugu akiitsut affaannanngortinneqartussaapput. Tamatuma anguniarnerani ukiormanna naatsorsuutigineqarpoq akiitsut 250 millioner koruuninik ikilinissaat.

Royal Greenland naatsorsuutitigut siuariarpoq nunarsuarmi aningaasarsiorneq akiitsoqarneq pillugu ajornartorsiuleruttortoq.

- Nioqquteqarfinni pingaarnerusuni atuisartut tatiginninnerat pitsaannginnerulissappt tamanna Royal Greenlandip naatsorsuutitigut angusaanut sunniuteqarsinnaavoq aammattaaq ukiumi matumani, Royal Greenland nalunaarpoq.

Royal Greenlandip 2010/2011-mut naatsorsuutais saqqummiunneqassapput siulersuisut ataasinngorneq januaarip 23-at ataatsimeersualerpat.