Royal Greenland saqquminerunini atornerlussimavaa
Nipisaap suaanik tunisinermi, iluanaaruteqarluarsinnaasumi taamaammallu unammilleqatigiiffioqisumit suliaq pinngorpoq.
2010-mi nipisarniarfiup nalaani Royal Greenlandi unammilleqatigiinnermit unioqqutitsilluni iluanaarniarsimavoq, aalisartut nipisaap suaanik Royal Greenlandimut tunisisut aasaanerani saarullinnik tunisinermi salliutinneqarnissaannik neqeroorfigisimammagit.
Salliutinneqarsinnaaneq aalisartunut pingaaruteqarsimavoq, aasaaneranimi saarullittarineqartut suliffissuarnut tuniniarneri ajornakusoornerusarmat.
Unammilleqatigiinnermut nakkutilliisoqarfimmi aqutsisoqarfimmi pisortap Nicolai Odgaard Jensenip eqqartuussut iluaraa.
- Aalisakkanik nioqqutissiorneq inuiaqatigiinnut pingaaruteqarpoq qaffasinnerusukkullu eqqartuussut suliffeqarfinnut saqquminernut, soorlu Royal Greenlanditut ittunut, nalunaarpoq unammilleqatigiinnermi iluameersumik pissusilersortassasut, Nicolai Odgaard Jensen oqarpoq.
Eqqartuussut aningaasatigut kinguneqarnavianngilaq. Royal Greenland naveersiinnarpoq.
- Unammillertaanut annertunermik kingunipiloqarsimanngitsoq nalilerparput, aqutsisoqarfimmi pisortaq Radioaviisimut ullumi oqarpoq.