Royal Greenland saarullinnik tarajortilaakkanik Paamiuni tunisassiulersoq
Royal Greenlandimi tunisassialerinermi ingerlatsisoq, Niels Wann, Jensen Nunatsinni tunisassiap nutaap qaffasissumillu pitsaassusillip tunisaalluarnissaa pillugu neriuuteqarluarpoq:
- Royal Greenlandimi saarullinnik tunisassiarineqartartut assigiinngiiaartut amerlanerulersikkusuppavut, ilutigalugulu saarulliit nerpii tarajortilaaikkat akigissaarmata tunisassiarisalernissaat isumatusaarneruvoq. Saarullinik tarajortilaakkanik aalajangersimasumik tunisassiortalernissap aallartinnissaanut pilersaarusiuleruttorpugut, Niels Wann Jensen Royal Greenlandip atuagassiaanut Navigiomut taama oqarpoq.
Europap kujasissuani mamarineqarluartut
Nunat allat tunisassiap nutaap pineqartup assinganik tunisassiortartut saarulliit tunisassiatik nerpii qaqqorinnilersinniarlugit akuutissianik soorlu fosfatinik atuisarput. Tunisassialli Kalaallit Nunaanneersut nerpii qaqqorereersuummata akuutissalersorneqartariaqanngillat.
- Tamanna tunngavigalugu tunisassiavut akuutissalersortariaqanngilavut, kisianni sorunami tarajortersinnaavagut. Tamanna pissutigalugu qaffasissumik pitsaassusilimmik piumaneqarluartumillu tunisassiornissatsinnut periarfissaqarpugut. Taamatuttaaq saarulliit nerpii tarajortilaakkat Europap kujasissuani tunisaalluartarmata tunisaqarluarnissamut periarfissagissaarpugut, Niels Wann Jensen oqarpoq, nangipporlu:
- Saarulliit nerpii tarajortilaakkat akii ajorisassaanngittuartillugit Paamiuni aalisakkanik tunisassiorfimmi pingaarnertut tunisassiarisarnissaat pilersaarutigaarput.
