Royal Greenland pissutsinut tulluussartoq
Raajartassat 85.000 tonsimit 73.000 tonsimut ikilisinneqarnissaannik Naalakkersuisut aaliangernerisa kinguneraat Sisimiuni Ililissanilu raajaleriffinni ukiumut ullut suliffiusut ullunik 25-it missaannik ikilisariaqarneri.
- Sisimiuni ilulissanilu raajaleriffinni naliginnaasumik ukiumut ullut suliffiusut 230-iusarput. Pisassiissutillu ikilinerisa kinguneraat raajaleriffinni taakkunani ukioq manna ukiumut ullut suliffiusut 205-it missaaniinnissaat, Káte Hansen, Royal Greenlandimi attaveqatigiinnermi pisortaq KNR-imut ilisimatitsivoq.
Nunamit allamit pisassanik pisisoq
Taamaakaluartoq Sisimiuni raajaleriffimmi sulisut nuannaarsinnaapput. Tassami Royal Greenland pisissanik, nammineq pimik saniatigut, pisisimavoq. Attaveqatigiinnermut pisortaq ilisimatitsivoq Royal Greenland raajartassanik 1.500-2.000 tonsinik canadamiunit pisisimasoq.
- Taakku raajat pisat Sisimiuni raajaleriffimmi suliarineqassapput, Káte Hansen oqarpoq.
Taanna aamma ilisimatitsivoq Royal Greenlandi raajanik avataasiorluni aalisagassat ilaat sinerissap qanittuani aalisarnissaannut Namminersorlutik Oqartussanut qinnuteqarsimasoq. Tamannalu piviusunngussappat sinerissap qanittuani raajat 1.000-3.000 tonsit akornanniittut aalisarneqassallutik.
