Royal Greenland pingasunngorpat ataatsimeersuassaaq
Royal Greenlandip ileqquusumik ataatsimeersuarnissani maanna piviusunngortinniarsarilerpaa. Ulloq sunaassanersoq aalajangerneqareerpoq. Ataatsimeersuarneq pissaaq pingasunngorpat, februaarip ulluisa 14-ianni, ulloqeqqata kingorna nalunaaqutaq marlunut, Nuummi Hotel Hans Egedemi, ukiorlu kingulleq qanoq ingerlasimanersoq siulittaasuugallartup, Birgitte Nielsenip, nalunaarutigissavaa.
Siulersuisuni siulittaasumik, siulersuisunilu ilaasortassanik, qinersinissaq ullormut oqaluuserisassanut ilaapput. Siulittaasunngortussap, aamma siulersuisunut ilaasortanngortussat, akissarsiassaat ataatsimeersuarnermi aamma akuersissutigineqassapput.
Ileqquusumik ataatsimeersuarnissaq Royal Greenlandip januaarip ulluisa 30-anni taamaatiinnarpaa.
Radioaviisip paasisai naapertorlugit siulersuisuni siulittaasuugallartup, Birgitte Nielsenip, ataatsimeersuarnermi tunuarnissaa naatsorsuutigineqarpoq, Peter Grønvold Samuelsenillu ullormi tassanngaanniit siulittaasunngornissaa ilimagineqarluni.
