Royal Greenland pillugu paasissutissat isertukkat tunniunneqarput

Inatsisartuni ilaasortat Royal Greenlandip aningaasaqarnera pillugu paasissutissanik isertukkanik suliffeqarfiup 500 millioni koruunit sinnerlugit tapiiffigineqarnissaata oqaluuserineqarnerani atortussanik tunineqarsimapput. Sermitsiap nittartagaani taama allaaserinnittoqarpoq.
Allattoq Mads Lynge
juunip 18-at 2009 17:13

Sermitsiap paasivaa, tamanna pillugu ilaasortat paasissutissanik tusagassiorfitsigut saqqummiunneqarsimanngitsunik tigummiaqartut.

Siumup siulittaasortaavata Aleqa Hammondip Inatsisartuni oqaatiginikuugaluarpaa, suliffeqarfiup aningaasaqarneranut tunngasut tusagassiorfinnit ilisimaneqareermata tamakku matut matullugit oqallisigineqartariaqanngitsut.

Sermitsiap paasisai naapertorlugit politikerit allakkianik 30-t sinnerlugit quppernilinnik tunineqarsimapput, ilaatigut suliffeqarfiup aningaasaqarnerata aaqqissuussaaneranut, aningaaserivinniit taarsigassarsiaanut allanullu tunngassuteqartunik. Paasissutissat mianernartut tamakku saqqummiunneqaraluarunik unammillersaanit iluaqutigineqarsinnaapput.

Tamannalu pissutigalugu naalakkersuisuni Inatsisartunilu amerlanerussuteqartut siulittaasoqarfiup matoqqasumik ingerlatsisoqarnissaanik kissaatigisaa akuersaarpaat. Aleqa Hammond Sermitsiap paasisaanik ilisimatinneqarpoq, isummanili aalajangiusimavai.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq