Royal Greenland paasisitsiniaavoq
- Ilisimatitsissutigisakka tassaapput Royal Greenlandip tunitsivinnik tigusisnerminut suut 2007-imi tunngavigisimanerat. Taamani apriilip aallaqqaataani Arctic Green Foodiminngaanniit / KNI-minnganniit tunitsiviit tiguneranut tunngaviupput, saarusseqassuseq, saarulliit akii, taamanikkut pitsaasut, aamma biologit saarulleqassusermik nalunaarutaat isumalluarnartumik nipilik, Paaviaaraq Heilmann oqarpoq.
Ukiuni kingullerni marlussunni misilittakkat takutippaat tunisassiorfiit qulit aningaasartuuteeqarfiungaatsiarsimasut aamma teknikkikkut inissisimanerat ilimagisamit ajornerusimasoq.
- Taammaammat januaari qaammat tamanut nalunaarpugut tunisassiorfiit matusariaqartut. Aamma ilisimatitsissutigaara naalakkersuisut namminneq aamma aaqqiissutissamik saqqummiussaqarniartut, Paaviaaraq Heilmann oqarpoq.
Niaqornaarsummiut neriupput tunitsiviit ammaqqinneqassasut, tamannalu periarfissaqarnerarpaa.
- Nalunaarutigineqartut aallaavigalugit, aap periarfissaqarpoq. Oqaatigisinnaanngilarali qaquguussanersoq, oqarpoq.
Tunisassiorfeeruttut toqqissisimanngimmata paasilluarsinnaanerarpai
- Aalisartut kalaallillu allat nunatsinniittut inooqatiginikuullugit killiffik nalornisitsivoq. Toqqissisimaffiunnginnerat paasilluarpara, suu, Royal Greenlandip pisortaa oqarpoq.
Sinerissami tunitsiviit ammaqqinnissaat siunertaralugu Naalakkersuisut suligasuartussamik ataatsimiititaliorsimanerat, ataatsimiititaliallu taassuma piffissami qanittumi qanoq aalajangersimanerminik tusarliinissaa suli utaqqimaarneqartoq Paaviaaraq Heilmannip ilanngullugu nassuiaatigaa.
Royal Greenlandip pisortaata Paaviaaraq Heilmannip Niaqornaarsuup katersortarfiani ataatsimiititsineranut Niaqornaarsummi innuttaasut soqutiginnilluarlutik 80-it missaanniittut najuupput.
Paviaaraq Heilmann Niaqornaarsummi innuttaanusunut ataatsimiititsereerami Ikerasaarsunnut Kangaatsiamullu tunitsiviit tunisassiorfiillu matoqqanerat pillugu aamma ilisimatitsiartorpoq.
