Royal Greenland nutaamik sanaartorlunilu allileriniartoq
Aappilattumi tunisassiorfittaassap maanna toqqorsiviusumit marloriaammik inissaqarnerulernissaa pilersaarutigineqarpoq. Royal Greenland naapertorlugu, ukioq kaajallallugu tunisassiornermut tunisinissamullu tamanna periarfissanik nutaanik pilersitsissaaq.
- Aappilattumi aalisartut taamaalillutik tunisassiorfimmut ukioq kaajallallugu tunisisinnaalissapput. Aamma Aappilattumi sulisuvut ukioq kaajallallugu tunisisassiorsinnaalissapput. Royal Greenland Upernavimmi ingerlatsinermut pisortaq, Flemming Andersen, taama oqarpoq.
Ingerlatsinermut pisortap aamma oqaatigaa tunisassiorfik 2017-ip naanerani naammassineqarpat sulisut pingasunik ilaneqarnissaat Royal Greenlandip naatsorsuutigigaa.
Nutarterineq allilerinerlu
Kullorsuarmi maanna tunisassiorfiusoq nutarterneqarlunilu allilerneqassaaq. Tunisassiorfiup toqqorsiviata inissaqarnerulerneratigut sulisunik angerlartitsisariaqarneq pinngitsoorneqarsinnaassasoq Flemming Andersenip neriuutigaa:
- Aalisartut sikuunerata nalaa tamakkerlugu tunisassiorfimmut tunisisinnaalernissaat neriuutigaarput. Toqqorsiviup inissaqarnerulerneratigut ingerlaavarnerusumik tunisassiortoqarsinnaalernissaa aamma neriuutaavoq, taamaalilluta Kullorsuarmi sulisutsinnik angerlartitsisariaqarnissaq pinngitsoortissinnaavarput, Flemming Andersen taama oqarpoq.
Kullorsuarmi nutarterinerup allilerinerullu ukioq manna septembarimi naammassineqarnissaat Royal Greenlandip naatsorsuutigaa.