Royal Greenland: Nunatsinni aatsaat taama raajartoqartigaaq
![](/sites/default/files/styles/image_934x467/public/article_images/avataq1.jpg?itok=N456APkR)
Royal Greenlandip kilisaataataa Avataq raajanik 903 tonsinik Sisimiuni ataasinngonermi usingiarpoq.
Suliffeqarfik naapertorlugu nunatsinni aatsaat taama raajartoqartigaaq.
- Aatsaat taama raajartoqartigaaq, kilisaatip naalagaa Jógvan Tróndarson oqarpoq.
Avataasiornermi ataatsimi raajartat nalinginnaasumik 400-500 tonsiusarput.
- Apriilip ulluisa 25-anni kilisalluta aallartippugut, sapaatillu akunnerini pingasuni raajartavut 903 tonsiupput, Jógvan Tróndarson oqarpoq.
Avataq nunatsinni kilisaatit annerpaartaraat.
2.850 kubikmeterinik usisinnaatigaaq.
82,3 meteritut takitigaaq 18 meteritullu silitsigaluni.
Qaleralinniutaallunilu raajarniutaavoq.
- Usingiariartorluta ataasinngornermi tikippugut. Raajartatta 18 procentii Sisimiuni raajaleriffimmi uullugit qalipaajarlugillu tunisassiarineqassapput, sinnerilu qalipalipaqartillugit qaqerlaatut uusutut avammut tunisassiarineqassallutik, Jógvan Tróndarson oqarpoq.
Jógvan Tróndarsonip kilisaatit naalagaat allat oqaloqatigisimavai. Taassumalu oqarnera naapertorlugu taakku raajanik aatsaat taama usisoqartigisoq tamannalu nunatsinni aalisarnerup oqaluttuarisaaneranut pingaaruteqartoq uppernarsarpaat.
- Qajaq Trawlip kilisaataataa Markus raajanik 870 tonsinik sapaatit akunneranni kingullermi usisoq ilisimavarput, taamanilu aatsaat taama usisoqartigaaq, Jógvan Tróndarson oqarpoq. Taassumalu kilisaammi Avatami inuttat 24-t nersualaarpai.
AAMMA ATUARUK Nunatsinni raajarniutit annerpaartaat tikilluaqquneqarluartoq
- Umiarsuaatileqatigiiffiit unammillinngikkaluarlugit inuttavut tulluusimaarutigaakka. Avataaniinnitsinni uani ulapaaqaat. Raajarluarsimanertik aamma nuannaarutigeqaat.
Avataq Spaniami Bilbaomi sananeqartoq Nuummut decembarip ulluisa 21-anni tikippoq.
Royal Greenlandip immikkoortortatut ingerlatseqatigiiffiutaata Ice Trawl A/S-ip raajanut kilisaataatitaassaa Nataarnaq ukioq ataaseq qaangiuppat tikissaaq.
- Kilisaatinik nutaalianik kilisakkaangatta piffissamik nukissamillu sipaartarpugut, Jógvan Tróndarson oqarpoq.
- Maanna sivisunerusumik avataaniittalerpugut, siornatigummi usingiariartukulallutalu avalaqqikulagatta. Kilisaatini nutaannginnerusuni usinik ulikkaaraangatta Upernaviup eqqaaniit Nuummut Sisimiunulluunniit usingiariartortarpugut. Maanna sivisunerusumik avataaniittarpugut, qerititsivippullu aalisakkanik raajanillu ulikkaaqqaarusuttaratsigu usingiariartornissaraluarput sipaartarparput, kilisaatip naalagaa nassuiaavoq.