Royal Greenland: Kukkusumik isummersorneruvoq
Tamanna Royal Greenlandip pisortaanerata Flemming Knudsenip aamma pisortap Paaviaaraq Heilmannip tusagassiuutinut nalunaarumminni erseqqissarpaat.
- Royal Greenlandip akiitsuminik taarsersuinissaa pissutigalugu aalisartut akiluttortinneqarnerannik oqarneq kukkuluttortumik isummersorneruvoq. Suliffeqarfinnit allanit Royal Greenland allaanerunngilaq aamma aalisartoq attartorluni umiatsiartaarsimasoq assigerluinnarpaa, tusagassiuutinut nalunaarumminni allapput.
Aalisakkanut akigitinneqartartut aalajangiiffigineqarneranni pissutsit assigiinngitsut Royal Greenlandimit tikkuarneqarput. Aalisartut aalisagartaminnut qanoq akilerneqarnissaannut, nunat tamat akornanni unammilleqatigiinneq pingaaruteqarluinnarpoq. Ingammik nunani kangillerni aalisakkanik tukertitsiviit unammillernerat alliartuinnartoq akinut pingaaruteqaqaaq.
- Nioqqutissiassat ilaannik akikinnerutitsinerput pillugu assersuutissaqartuaannassaaq, soorlu raajat eqqarsaatigalugit taamaattoq. Akerlianilli qalerallit saarulliillu akisunerutippavut. Taamaattumik pisiortornitsinni ataatsimut isigalugu akitigut appasinnerutitsisutut oqaatiginiarneqassagutta akueriuminaappoq, Royal Greenland tikkuaavoq.