Royal Greenland immikkoortitsinerarpaa

Kattusseqatigiit Partiiata siulittaasuata Anthon Frederiksenip Royal Greenland kalaallit sulisartuinik danskit sulisartuinut naleqqiullugit immikkoortitsinerarlugu pisuutippaa.
Allattoq Jokum Nielsen
novembarip 30-at 2007 07:18

Tamatumunnga pissutaanerarpaa Royal Greenlandimit ippassaq oqaatigineqarmat Danmarkimi tunisassiornerup ilaa Polenimut nuunniarneqartoq. Tamannalu Jyllandip Avannaani Glyngøremi suliffissuup sulisuinik 130-nik naleqarsinnaasoq.

Taama pisoqarpat, sulisut ilinniarteqqinneqarnissaat, allamik suliffissarsiornissaat ilinniagaqalernissaalluunniit Royal Greenlandip isumaginiaraa oqaatigineqarpoq.

Tamanna ajunngilluinnartoq Anthon Frederiksen isumaqarpoq, kisianni Royal Greenland nunatsinni sulisuminik soraarsitsigaangami sooruna taamaaliorneq ajortoq? Paragraf 36 naapertorlugu naalakkersuisunut apeqquteqaammini taama aperivoq.

Anthon Frederiksen isumaqarpoq tamanna akuerineqarsinnaanngitsumik immikkoortitsinerusoq, tassani Royal Greenland nunatsinni sulisuminik soraarsitsigaangami aamma ikiuuttariaqaraluarmat.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq