Royal Greenland-imi pisortaq kalaaliuppat ajornartorsiortitsinavianngilaq

Kalaaliuneq atorfittaarniarnermi iluaqutaavoq, ajortisaarutaanani, taama Lars-Emil Johansen Danmarks Radiomi P1-mi oqallinnermi ilaatigut ullumi oqarpoq. Oqallititsinermi danskit namminersornerusut suliffeqarfiutaannit qimarngunerat eqqartorneqarpoq. Royal Greenlandip siulersuisuisa siulittaasuata danskiusup kalaallimik taarserneqalernera aamma eqqaaneqarpoq.

Paatsiveerunnersuaqarpoq, namminersornerullutik oqartussat suliffeqarfiutaanni pilersaarusiortoqanngilaq, suliffeqarfiit politikkikkut aqunneqarput, taama oqallititsinermi apersorneqarsimasut kalaallit nunaanneersut tusagassiortut Hagen Højer Christensen, Erik Holmsgaard aamma Poul Krarup assigiimmik oqariartuuteqarput DR-ip nunatsinni apersuisitaanut Charlotte Holding Møllerimut.

Sparbank Vestimi direktøriusimasoq Sven Lyse aamma Grønlandsflyusimasumi direktøriusimasoq Ole Bjerregaard, eqqissisimanerupput. Taakkumi isumaqarput kalaallit piukkunaateqarluartut toqqarneqarpata, Royal Greenlandip siunissaa ajornartorsiornavianngitsoq.