Royal Greenland: Ernumanartoqanngilaq
Royal Greenlandip aningaasatigut inissisimanera pillugu Partiit Atassut naalakersuisunngortussanut paragaraf 36 atorlugu arlalinnik apeqquteqarpoq. Atassutip naalakkesuisunut apeqquteqaateqarnermini tunngavilersuivoq Royal Greenlandip aningaasatigut inissisimanera ajorluinnarmat, naalakkersuisut qanoq iliuuseqanngippata, suliffeqarfissuaq akiliisinnaajunnaassasoq.
Royal Greenlandilli pisortaata Flemming Knudsenip aningaasatigut ajornartorsiortoqarneraalluni oqaaseqarneq paasisinnaanngilaa, ilumuunnginnerarlugulu. Tusagassiutitigut nalunaarummi aningaasarsiornikkut ajornartorsiortoqarnera pisisartullu ikiliartornerat, tunisassiornerlu ajornarerulersimanera pillugu nalunaarutit pisortaanerup ilisarisinnaannginnerarpai.
- Suliffeqarfissuaq Royal Greenland pilersinneqarmat sanaartukkanik sanaartornissamut aningaasanik atornikuuvoq. Royal Greenlandip piunermini ataasiaannarluni aningaasaliiffigineqarpoq, tamannalu pivoq ukioq 2000-imi 200 millioner koruuninik aningaasaaliffigineqarami, ukiorlu taanna aningaasaliissutit utertinneqarput 240 millioner koruuninngorlugit, Flemming Knudsen oqarpoq nangilunilu:
- Taamaattumik suliffeqarfissuaq piffissami piunermermini annertuunik akiitsoqarpoq aningaasaqarneranut naleqqiullugu. Tamannalu Royal Greenlandip siorna naatsorsuutaani erseqqissarparput, kingorna Namminersornerullutik Oqartussat ataanni suleqatigiissitamik pilersitsisoqarpoq suliffeqarfissuup siunissami aningaasatigut inissisimanera pillugu misissuisussamik.
Suleqatigiissitaliap suliani suliareerpaa, nalunaarusiaalu naalakkersusunnngortussanut inatsisartut ataatsimiinneranni saqqumiunneqassaaq. Nalunaarusiaq Royal Greenlandip aningaasarsiornikkut iliuusissaanik innersuussutinik imaqartussaavoq.
Tunisassiorfissuaq Royal Greenland ingerlavoq, tunisassiornerli ilungersunarnerulaarpoq, siornatigut tunisassiortarnerminut naleqqiullugu Royal Greenlandip pisortaa Flemming Knudsen oqarpoq.
