Royal Greenland: Ataatsimiititaliarsuup suliaa iluarinarpoq

- Aalisarneq pillugu ataatsimiititaliarsuup suliaa assut nersualaarusuppara, Kalaallit Nunaanni suliffissuaqarnikkut ineriartortoqarnissaa Ataatsimiititaliarsuup ilimagaa. Suliffeqarfiit nutaat pilersinneqassapput, inuillu aalisarnermiit suliffinnut allanut nuussapput. Tamanna pissutigalugu aalisarnerup iluani allanngortiterinerit pisariaqassapput, Royal Greenlandip pisortaanera Flemming Knudsen oqarpoq.

Aalisarnerup iluani allanngortiterinerit malitsigisaanik tunitsiviit ikiliartuaarsinneqarnissaat aalisariutillu ikilisarneqarnissaat Royal Greenlandimit isumaqatiginartinneqarpoq, aalisariutillu tulaassisussaatitaanerat piffissap ingerlanerani taamaatikkiartuaartinneqarnissaanik Aalisarneq pillugu ataatsimiititaliarsuup innersuussuteqarnera, Flemming Knudsenip isumaqatigaa, imaaliallaannarluguli taamaatinneqarnissaa orniginartinngilaa:

- Piffissap sivisuup iluani tamanna pissaaq, tunitsivinnullu aningaasaliisimasut eqquinnginnissaq pingaaruteqarpoq, sulisunillu eqquinerluttoqannginnissaa aamma pingaaruteqarluni, Flemming Knudsen Radioaviisimut oqarpoq.

- Kalaallit Nunaanni suliffissaqartitsiniarnermi Royal Greenland pingaaruteqartoq nalunngilara, Kalaallilli Nunaat nunarsuarmioqatiminit immikkoortutut isigissanngilaq. Unammilleqatigiinnermut peqataasariaqarpoq, tunisassiornermilu aningaasartuutikinnerusut matumani unammilleqatigiittariaqarpagut. Taamaammat aalisarnerup iluani allanngortiterinissat pisariaqarput, imaaliallaannarluguli allanngortiterisoqarnissaa sianigisariaqarpoq, piffissap sivisuup iluani pisariaqarluni, Flemming Knudsen oqarpoq.