Royal Greenland aningaasameeqqinnianngilaq
Namminersorlutik Oqartussat suliffissuaataata Royal Greenlandip, ippassaq avammut tusarliuppaat 43 millioni koruuninik ukioq 2009-2010-mut naatsorsuutini amigartooruteqarlutik. Royal Greenlandimiilli neriorsuutigineqarpoq, siunissami pitsaanerusumik angusaqarumallutik.
Naak neriorsuutit malillugit, Royal Greenland amigartooruteqartussanngikkaluaq, naatsorsuutit malillugit ukioq 2009-imi 2010-imilu ukiumoortumik naatsorsuutit malillugit 43 millioni koruuninik amigartoorpoq.
Royal Greenland ukioq 2009-imi inuttaasut akileraarutigisartagaannit tassa Namminersorlutik Oqartussaniit ukiumut tapiissutaasut saniatigut, 500 millioni koruuninik tunineqarput. Maannalu 43 millioni koruuninik amigartoorsimaneq, Naalakkersuisut siulittaasuannit Kuupik Kleistimit eqqarsaatissatut tiguneqarpoq.
Ilimagineqarsinnaanerluni Royal Greenland, inuit akileraarutaanik ikiorserneqaqqissanersoq?
- Aningaasanik tapiiffigineqarnitta kingorna ukiuni tulliuttuni tallimani suleriusissatsinnik malittarisassiorsimavugut. Taamaattumik oqaluuserinikuuarput, ukiut tallimat ingerlaneranni aningaasaqarnerput ilorraap tungaanut ingerlatissallugu.
- Taamaammat siunissami amigartooruteqarluta aningaasanik matussutissatsinnik tunineqaqqinnissarput naatsorsuutiginngilarput, Flemming Knudsen Royal Greenlandimi pisortaq oqarpoq.
Royal Greenland ukiumoortumik ataatsimeersuassaaq Nuummi januaarip 26-ani, tassanilu oqaluuserineqassallutik suut ukiuni tulliuttuni anguniarneqassanersut.