Royal Greenland amigartooreerluni ukiup affaani siullermi millioninik iluanaaruteqartoq
Royal Greenlandimi nuannaarutissaqarluarpoq, tassami 2026-mi ukiup affaanut naatsorsuutit saqqummiunneqarput.
Ingerlatseqatigiiffik Namminersorlutik Oqartussanit pigineqartoq siorna taamaalinerani 11 millionit koruuninik amigartooruteqarpoq, maannalu akileraarutit akilinnginnerini ukiup affaa qaangiummat 217 millionit koruuninik iluanaaruteqarluni.
Royal Greenland tusagassiuutinut nalunaarummi taama allappoq.
- Siorna piffissami tassani angusatsinnut sanilliullugu malunnaatilimmik pitsaanerusumik angusaqarpugut, tamannalu naammagisimaarparput, pisortaaneq Toke Binzer tusagassiuutinut nalunaarummi taama oqaaseqarpoq.
Taanna Royal Greenlandimi siorna decembarimi pisortaaninngorpoq. Taassumalu 2025-mut akileraarutit akilinnginnerini 6 millionit koruuninik iluanaaruteqarsimanertik maajimi saqqummiuppaa.
Tamanna ukiuni arlalinni siullerpaamik iluanaarutaavoq.
- Niuffaffinni akit pitsaasut annertuumik pingaaruteqarsimapput, angusarlu aamma suliffeqarfik tamakkerlugu pitsanngorsaanerit ingerlassimasatta sunniutaanik ersersitsivoq, Toke Binzer oqarpoq:
- Royal Greenlandip nukittunerulernera ingerlatsinitsinnut aningaasaliinissamut aammalu pisuussutit uagutsinnut isumagisassanngortinneqarsimasut atorlugit nalilinnik pilersitsinissamut pitsaanerusunik periarfissaqalersippaatigut – suliffeqarfimmut inuiaqatigiinnullu kalaallinut iluaqutaasumik.
Royal Greenlandimi tunisat annertussusaat siornatulli amerlassuseqaraluartut kaaviiaartitat 16,5 procentimik qaffariarput, tassa 3 milliardit koruunit sinnilaarlugit naleqartut.
