Royal Greenland aatsaat taama sinneqartooruteqartoq
Royal Greenlandip 2021-mi akileraartinnani 326 millionit koruunit anguai, aatsaallu taama inernerissaartigaluni.
Suliffeqarfissuaq tusagassiuutinut nalunaarummi taama paasissutissiivoq.
Ukiuni kingullernut angusanut sanilliullugit
Ukiuni kingullerni angusanut sanilliullugu pitsanngoriaataavoq ersarissoq – aamma coronap nunarsuarmi tamarmi tuniluunnera sioqqullugu angusarineqartartunut.
Akileraannginnermi angusat nalinginnaasut (tassa kilisaatinik tunisinnginnermi angusat) 326 millionit koruuniusut aatsaat taamak annertugipput, kaaviiaartitallu 5.638 millionit koruuniullutik 16 procentimik qaffapput.
AAMMA ATUARUK Royal Greenlandip Ruslandimut niuernini unitsikkaa
- Royal Greenland A/S-ip nualluutip nunarsuarmi tuniluunnera unammillernartoqaraluartoq aalisarnerup, tunisinerup, tunisassiornerup tuniniaanerullu pilersaarutit naapertukannerlugit ingerlaannarnissaa 2020 aallartilaartorli aalajangerpaa, Royal Greenlandimi pisortaaneq, Mikael Thinghuus oqarpoq.
- Suliffeqarfissuaq immami nunamilu atorfiit tamaasa inuttaqartillugit, piumaneqarluartunik naammattunillu uninngasuusivimmiittuuteqarluni nunanilu tamalaani pilersuisunut pisisartunullu attaveqarluarnini attatiinnarlugu 2021-mut ikaarsaarpoq.
- Aalisarnerput tunisassiornerpullu annikillingaatsiarsimagaluarutsigu pisuussutinik pissarsinissatsinnut ataavartumik ajoqutaallunilu najukkani innuttaasuni suliaqarfigisatsinni isumaginninnikkut aningaasaqarnikkullu annertuumik ajornartorsiortitsilersimassagaluarpoq, Mikael Thinghuus itisiliivoq.
Amerika Avannerlermi saattuat
Royal Greenlandip oqarnera naapertorlugu angusarissaarneq pingaartumik saattuat Amerika Avannarlermi pisarineqartut raajallu qaleruallit nunatsinnit pisarineqartut tunisaalluarnerannik pissuteqarpoq.
Tamatuma saniatigut raajat uusut qalipaajakkallu aamma qalerallit saarulliillu 2021-p ingerlanerani tunisaallualeqqipput, taamaakkaluartorli coronap tuniluutilinnginneratulli annertutiginngitsumik. Amerika avannarlermut tunisaqarneq annertunerulerpoq.
Coronamik nunarsuaq tamakkerlugu tuniluuttoqarnera Royal Greenlandimut eqquinerlungaatsiarpoq. Suliffeqarfissuup 2020-mi ukiup affaani siullermi 39 millionit koruuninik amigartooruteqarpoq.
AAMMA ATUARUK Kinamut tunisassiornerup ajutoorujussuarnissaralua Royal Greenlandimit pakkersimaarneqarpoq
Suliffeqarfissuup Kinamut tunisaqartarnerup uninnissaa ernumassutigilereeraluarpaa, 2021-mi aallartinngitsorluunniit Royal Greenlandip Kinamut milliardit nalinganut tunisaqartarneranut mattussivileraluarpoq. Kinammi covid-19-imut atatillugu avataanit pisianut malittarisassaliai ima annertutigimmata allaat tunisat Europami Kinamilu qerititsivinnik ulikkaartoortitsivoq, taamaalillunilu piniarneqartunit aalisakkat amerlanerungaatsialerlutik.
Tuniniaanermut pisortap, Bruno Olsenip tamanna suliffeqarfissuarmut naggataatigullu nunatsinni aalisartunut kingunerlungaatsiarsinnaasoq ernumassutigileraluarpaa. Taamaattoqanngilarli.
Pisortaaneq soraartoq
Naak Royal Greenland decembarimi qarasaasiatigut saassutsinnermik eqqugaangaatsiaraluartoq 2021-mi angusarissaartoqarpoq. Qarasaasiatigut saassussinneqarnerup kingunerisaanik qarasaasiatigut nunarsuarmi tamarmi atortorisaat piffissami sivisuumi matoqqapput.
Mikael Tinghuus pisortaanertut atorfimminit aasamut soraassaaq. Taanna 60-inik ukioqarpoq, taannalu Namminersorlutik Oqartussat suliffeqarfiutaani ukiuni aqqanilinni pisortaaneruvoq.
