Royal Greenland aatsaat taama angusarissaartigisoq
Royal Greenlandip 2019-imi akileraannginnermi angusai 404 millionit koruuniupput, ingerlatseqatigiiffillu oqaluttuarisaanermini aatsaat taama angusarissaartigaaq.
Aatsaat taama angusarissaartiginera kilisaatit marluk, Sisimiut aamma Qaqqatsiaq, 141 millionit koruuninik isertitaqarfiusumik tuninerannik aallaveqartoq, ingerlatseqatigiiffik Namminersorlutik Oqartussanit pigineqartoq tusagassiorfinnut nalunaarpoq.
Royal Greenlandip raajanik issittup imartaaneersunik, qaleralinnik saattuanillu Atlantikup Avannaata imartaaneersunik nunarsuarmi pilersuisuni siuttunngornissaminut iliuusissatut pilersaarutini iluatsilluarsimasoq, ingerlatseqatigiiffiup nammineq nalunaarutigaa.
- Iliuusissatut pilersaarutitta attanneqarsinnaasuunera ukiut arfinilissaannik erserpoq, Royal Greenland nalunaarpoq.
AAMMA ATUARUK Coronavirusip Royal Greenlandimi sulisut apuutsinnaveerai
Kaaviiaartitat procentinik pingasunik qaffattut, ingerlatseqatigiiffik ilisimatitsivoq.
Kisianni ukiup affaani kingullermi angusat raajat uusut qalipaajakkallu akiisa nikerarnerannit sunnerneqarnerat unammillernartoqarpoq. Ukioq manna kaaviiartitat 77 procentii raajanit uusunit qalipaajakkanillu aallaaveqarput, ukiut arfinillit matuma siorna 41 procentiinnaasimasut.
Suliffeqarfissuup Novo Scotiami ingerlatseqatigiiffik A&L Seafoods pigileqqammigaa Chilemi ingerlatseqatigiiffillu aningaasaqarnikkut suleqatigiinnermut isumaqatigiissuteqarsimasut, suliffeqarfissuup Royal Greenlandip aamma ilisimatitsissutigaa.
Royal Greenlandip Chilimi ingerlatseqatigiiffimmi saattuarniarnermik annerusumik aallussisumi, International Seafoodimi, piginneqataassutit affaat pisiarisimavai.
Coronavirusi sunniuteqartoq
Royal Greenlandilli coronavirusi ajornartorsiortitsimmat ukioq manna ikinnerusunik sinneqartooruteqarnissani naatsorsuutigaa.
- 2020-mi angusat pisunit sunnernerlunneqassaqisut naatsorsuutigaarput, ingerlatseqatigiiffik tusagassiorfinnut nalunaarpoq.
Coronavirusip ajornartorsiortitsinera ukioq manna kaaviiaartitanut qanoq sunniuteqartigissanersoq kimilluunniit soorunami suli ilisimaneqanngilaq.
- Kaaviiaartitat pisunit assigiinngitsorpassuarnit, minnerunngitsumik coronavirusip sivisuumik ajornartorsiortitsineranit, sunnernerlunneqassapput, kaaviiaartitalli qanoq ikinnerutigissaqinersut oqaatigisinnaanatigu, Royal Greenland ilisimatitsivoq.
- 2020-mili aalisarneq tunisassianillu nioqquteqarneq ingerlalluassangatippavut, coronavirusilli nunarsuarmi niuernitsinnut sunniuteqangaatsiarnera unammillernartoqangaatsiassaaq.
