Royal Greenland: Aalisartut tamarmik tunisisinnaatitaapput
Qeqertarsuatsiaani aalisartut suliffeqarfinnut allanut nipisat suaannik tunisisarsimasut mattuneqarsinnaanerinik nipeqartumik allagartaliineq aalassassimaaarutaavoq.
Kisianni Royal Greenlandip pisortaa, Paaviaaraq Heilmann ima neriorsuivoq:
Aalisakkanik pitsaasunik Royal Greenlandimi tuniserusuttut tamarmik tikilluaqquneqarput. Aamma saarullinnut atatillugu Qeqertarsuatsiaani sinerissamilu allani tunitsivitsinni aalisartut tamarmik tunisisinnaatitaapput.
Royal Greenlandip Qeqertarsuatsiaani tunisassiorfianit allagarsinikkut sapaatiummat ataatsimiigiaqqusisoqarpoq, saarullinnik tunisassiulernissaq eqqartorneqassalluni.
Erseqqissaatigineqarporli:
"Romarkimut suannik tunisisarsimasut suli Royal Greenlandimut tunisinissaminnut periarfissinneqassanersut aalajangiisoqanngimmat sulialli ingerlanneqarmata".
Tassalu suliffeqarfimmut unammillertumut tunisisarsimasut mattunnissaat eqqarsaataasimavoq.
Tamanna Qeqertarsuatsiaani aalisartut aalassaatigeqaat.
Aalisartoq Morten Johnsen ataasinngornermi ima oqarpoq:
- Mamaatsorujussuuvoq. Ukiup qaammataani aqqaneq marlunni tunioraajuarluta, nipisat suaanik tunisinerup nalaani qaammat ataaseq sinnilaarlugu tunitsivimmut allamut tunisinerput taamatut pillarneqaatigaarput.
Allagartaliussaq taamaalilluni illuatungilerneraa, Paaviaaraq Heilmann apereqqikkatsinni, akissutiminik uteqqiivoq:
- Aalisartut tamarmik Royal Greenlandip tunitsiviinut saarullinnik aamma tunisisinnaatitaapput.
Qularnaatsumik oqaatigisinnaaviuk, unammillertissinnut allaanilluunniit tunisisarsimagaluartut aamma ilissinnut tunisisinnaajuassasut?
- Royal Greenlandimut tunisisinnaapput, aalisarsinnaanermut akuersissutinik pigisaqartut. Taamanna ingerlaannassaaq.