Royal Arctic Line-p sullitai inniminniivallaartarput

Angalanissamut inissanik sinnerlugit tunisaqartarneq timmisartuutileqatigiiffiit kisimik ajornartorsiutiginngilaat. Umiarsuaatileqatigiiffiup Royal Arctic Line-p tamanna aamma misilittagaqarfigaa, angalaniartunulli atatinnagu, kisiannili nassiussanut atatillugu.

Umiarsuaatileqatigiiffiup atuagassiaatimini, Royal Arctic-imi, tamanna oqaluttuaraa. ”Naja Arctica” Aalborgimiit Narsamut, Aasiannut, Sisimiunut Nuummullu angalassalluni maajip ulluisa aappaanni aallassammat nassiussat 10.000 kubikmeterinik initutigisut ilaatinneqartussatut sullittagaasa inniminnersimavaat, kisianni 1000 kubikmeterit missaannik annikinnerit tunniunneqarsimapput. Taakkulu assigaat containerit 20 fodsit 40-t ulikkaartut imarisinnaasaat.

- Ikittunnguit containerit inissaannik amerlanaarlugit inniminniisartut taama iliortarput, uani

tunisassatik imaluunniit pisiarineqartussanut tunngatillugu isumalluarpallaarneq tungavigalugu. Allalli taamaallaat inissaqartitsinissaq qulakkeerniartarpaat, inniminniinermilli allanngortinnissaa imaluunniit taamaatiinnarnissaa puigortarlugu, tunngavigisassatik allanngoraangata, Royal Arctic allappoq.