Royal Arctic Line 40 millionit koruuninik amigartoorpoq

Aningaasarsiornikkut ajornartoornerup aamma nunarsuaq tamakkerlugu aningaasaqarniarnerup ajornartoornerata kingunerisai usit amerlassusiatigut, aammalu Royal Arctic Linep ukiup qiteqqunnerani naatsorsuutitigut angusaani, takuneqarsinnaalluarput, tassami siornamut naleqqiullugu 10 millionit koruunit sinnerlugit annertunerusumik ukioq manna amigartoorpoq.
aggustip 31-at 2009 11:33

Ukioq kingulleq ukiup affaani siullermi akileraarutit ilanngaatiginagit 29 millionit koruuninik amigartoorpoq, amigartoorutillu ukioq manna 10 millionit koruuninik amerleriarput, tassa akileraarutit ilanngaatiginnginnerini 40 millionit koruuninik.

Suliffeqarfissuup nalunaarutaa naapertorlugu naatsorsuutitigut angusat appariarnerat assartuinermi tunngaviusumik akigititanit isertitat appariarnerannik tunngaveqarpoq. Nunatsinnut nassiussat 10 procentimik appariarput, Nunatsinniillu nassiussat 5 procenti sinnilaarlugu appariarlutik, amigartooruteqarnermullu taakku pissutaanerarneqarput.

Royal Arctic Linep amigartoorutai siunissami qaninnermi ikileriassagunanngillat. Naatsorsuutigineqarpoq akileraarutit ilanngaatigitinnagit 30-35 milllionit koruuninik ukiumut sinneqartuussasoq.

Tamannalu ukiumoortumik nalunaarusiap 2008-p saqqummiunneqarnerani naatsorsuutigisanit 5-10 millionit koruuninik appasinneruvoq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq