Royal Arctic Line A/S 12,7 millioninik amigartoorfiuvoq
Umiarsuaatileqatigiiffiup Royal Arctic Linep 2007-imi ukiup affaanut naatsorsuutaasa takutippaat akileraarutit ilanngaatiginagit amigartoorutit 12,7 mio. koruuniusut, akileraarutillu ilanngaatigereerlugit amigartoorutit 8,2 mio. koruuniusut. Siorna ukiup affaani siullermi naatsorsuutit sinneqartoorfiupput, taamani akileraarutit ilanngaatiginagit sinneqartoorutit 3,3 mio. koruuniummata, Royal Arctic Line A/S-imi siulersuisut 2007-mi ukiup affaanut nalunaarut akuerigaat, tusagassiuutinut nalunaarumminni allapput.
Ukiup affaata 2007-ip inernerani kaaviiaartitat appariarnerannut pissutaasoq pingaarnerusoq tassaavoq nunatsinniit avammut tunisanik assartuinermit isertitat aamma sullissinermi nalinginnaasumi isertitat ikileriarsimanerat.
Suliffeqarfiit Royal Arctic Linep ingerlataasa ukiup affaanut naatsorsuutaa ilimagisamit annikinneerarsuupput, assartukkat ikilisimanerat pissutaalluni.
Naatsorsuutigisatut nunaqarfinnik sullissivik Royal Arctic Bygdeservice A/S ukiup affaanut naatsorsuutaasa inernerat sinneqartoorfiunanilu amigartoorfiunngilaq.
