Roskilde Festival naammassivoq
Erinarsortartut nipilersortartullu nunanit tamalaaneersut Danmarkimi tusarnaartitsisarnerat ukiut tamaasa pisartoq Roskilde Festival ullumi naammassivoq.
Naak aallartimmalli tusarnaariat nipilersoriallu sialussuarmit akornusersorneqangaatsiaraluartut, aaqqissuussineq iluatsilluartutut nalilerneqarpoq.
Tusarnaariat ilarpassui, pingaartumik masassiuteqanngitsut ilaat ingerlaqqiinnartarsimagaluartut, aaqqissuisut amigartooruteqarnissartik ilimaginngilaat.
- Soorunami isertitagut naatsorsuutigisamit ikinnerulaarunarput, taamaalilluta siunertanut pitsaasunut tapiissutigisartakkagut ukioq manna ikinnerutittariaqassavagut, Esben Danielsen, nutaarsiassaqartitsivimmut Ritzauimut oqarpoq.
Bilitsit tamarluinnarmut Roskilde Festivaleqarnerani tusarnaartitsinerit aallartinngitsulli nungupput.
Ukioq mannalu marullussuup sialussuullu atuunnerisa kingunerisaanik imaassinnaavoq bilitsinik aappaagu tuniniaanerput ajornarnerulaassasoq, Esben Danielsen naliliivoq.
