Rosing kommunalbestyrelsimut uteqqippoq

Nivi Olsenip sinniisussaa, Suleqatigiissitsisut siulittaasuat Michael Rosing, naalakkersuinikkut taamaasilluni suliaqaqqilissaaq. Naallu Michael Rosing Demokraatinut ilaasortaajunnaareeraluartoq, Nivi Olsenimut Kommuneqarfik Sermersuup kommunalbestyrelsiani sinniisussaatitaanini pillugu kommunalbestyrelsimi maanna ilaasortanngussaaq, borgmesteri Asii Chemnitz Narupillu malittarisassat tassunga atatillugu AG-mut ima erseqqissarpai:

- Tamatumunnga tunngatillugu qinersinermi malittarisassani erseqqissorujussuarmik allassimasoqarpoq. Taamaalilluni qinigassanngortittuni sinniisussatut qinigaasoq ilaasortnngortussaavoq. Qinigassanngortittup pineqartup partiimut allamut kingusinnerusukkut nuussimanera apeqqutaatinnagu, Asii Chemnitz Narup AG-mut oqarpoq.

Tillie Martinussen Suleqatigiissitsisunik pilersitseqataannginnermi siorna Demokraatit sinnerlugit Kommuneqarfik Sermersuumi sinniisussatut siullertut inissisimagaluarpoq, qinigaaffinnulli marlunnut ilaasortaanissani taassuma akerliuffigaa, Kommuneqarfik Sermersuumilu kommunalbestyrelsimut ilaasortaanissani kissaatigisimanagu.