Rosa Marie Nuummut annguppoq
Isiginnaagassiaq Qeqertarsuarmi aasaq takuteqqaarneqarpoq, Kitaanilu illoqarfinni arfinilinni takutinneqareerluni. Unnugulu tassa illoqarfiit pingaarnersaanni takutinneqassaaq.
Isiginnaagassiami isiginnaartitsisartumit Else Danielsenimit kisimiilluni inuttaaffigineqartumi, peqqissaasoq suliniuteqarusuttorujussuaq, Qeqertarsuup Tunuanut 1960-ikkunni suliartortoq oqaluttuarineqarpoq.
Tamaani najugaqartut "ikiorlugillu annaannissaannik" piumassusilerujussuulluni tikippoq, pissutsilli piviusut naapitai naatsorsuutigisaaniit allaanerujussuupput.
Qaammatit qulingiluat qaangiummata pakatsisimaqaluni Danmarkimut uterpoq - tassa Nunatsinni pissutsit qanoq ittuuneri takoreersimallugit aamma tikisitat suliartortut qanoq atorsinnaanngitsigineri takoreerlugit.
Pissutsit piviusut naapitani pillugit sulisitsisumi oqaloqatiginissaat kissaatigigaluarpaa, tusaajumaneqanngilarli. Taamaattumik isiginaariat taassuma oqaatigerusutai tusarnaartariaqarpaat.
Rosa Mariep tiguartikkaluarneranik allaqqaartoq tassaavoq, Canadamiu atuakkiortoq nersornaatisisartoq Wendy Lill. Taassuma oqaluttuaa Canadami Indianerit reservatianni pisimasuutinneqarpoq. Nunattali Isiginaartitsisarfiata oqaluttuareqqitaani Qeqertarsuup Tunuani illoqarfiit ilaanni piviusuunngitsumi pisimasuutinneqarluni.
Canadamiu Pattie Shaughnessey ilitsersuisuuvoq, isiginnaagassiarlu unnugu Katuami inersuaaqqami nalunaaqutaq arfineq pingasut qeqqanut takutinneqartussaavoq aamma arfininngorpat sapaatiuppallu ualikkut pingasunut isiginnaariarneqarsinnaassaaq.
