Romat inigisaat nivattaassuarnik piiarneqarput

Pinerluttuliortarneq akiorniarlugu, Rumæniamit kingoqqisuunerarneqartartut angalaannartut, romat, præsident Sarkozy-p Frankrigimiit aniatippaai, taamaaliorneralu ministeriunerata Francois Fignonip allaat akuersaarsinnaannginnerarpaa, oqarluni, Sarkozy kimilluunniit qaquguluunniit nuannarineqaleqqinnavianngitsoq.

Allamiut sakkortuumik pinerluuteqarsimappata Frankrigimi innuttaassusaannik arsaartarniarlugit Sarkozy qanittukkut sioorasaarivoq, Sarkozyllu ministeriunera oqaannarpoq, misigissutsit oqariartaatsillu kialuunniit nammineq akisussaaffigigai.

Frankrigimi naalagaffiup iluani pissutsinut ministerip taamanikkut aamma siunnersuutigaa, muslimit arlalinnik nuliallit franskisut innuttaassusiiarneqassasut, siunnersuummullu tassunga ministeriuneq oqaannarpoq, ataasiinnarmik imaluunniit arlalinnik nuliaqarnerluni kialuunniit uppernarsarsinnaanngikkaa.

Romat anisitaajortornerat nunanut allanut ministerip Francois Fignonip kamaatigeqaa:

- Romat ikiorniarlugit qanoq iliussaanga? Tunuarniuteqarniarlunga eqqarsaatigigaluarakku. Taamaatiinnarpungali. Tunuaraluarumami asulersuaq suliniuteqarsimassagaluarpunga, Fignon oqarpoq.

Nunanut allanut ministerip tunuarniarnissaminik sioorasaaruteqariarluni tunuarniuteqannginnera illoqarfiup ineriartortinneqarneranut ministerip assuaraa, aammali oqarluni inuit innuttaassusaannik arsaarinnittarnermut nammineq akerliulluni.

Romat aasaq-manna oqallisigineqarnerujussuisa innuttaasunut ersiortitsilerlunilu uumissuisitsilersimanera Sarkozyp illersornissamut ministeriata aamma ajuusaarutigaa.

Uparuartuinerit Sarkozyp oqaaseqarfiginngilai.