Romat Frankrigimi qassiiliutaajuarsinnarput

Frankrigip Romanik anisitsisimanerat pillugu EU-mi Kommissionip isummersimanera Sarkozyp kamaammiutigisimavaa.

Frankrigip præsidentia qullersaqatimi ataatsimiinnerannut iserami annussimaqaaq Angela Merkel ersaatigut pingasoriarlugu kunippaa ataatsimeeqataasullu sinneri qissimipajunnangilluunniit EU-p kommisioniata siulittaasua Barosso soqutiginngitsuusaarluinnasimallugu.

Romamiunik anisitsisimaneq pillugu franskit aviisiini allaaserisarpassuarni Sarkozy ilungersuutissarsisimavoq EU-milu kommisionip EU-p eqqartuussivianut Frankrig suliassanngortinniarlugu sioorasaarpaa.

Inatsisinik atortitsinermut kommisæri Luxembourgimiuusoq Viviane Reding unnerluussisuuvoq Frankrigillu Romamiunik anisitsinera kanngunarsaataanerarlugu.

- Sorsunnersuaq kingulleq pimmalli kanngunarsaammik taamaattumik misigisaqaqqinnissara ilimagisimanngikkaluarpara, kommisæri oqarsimavoq. Taamalu oqarnera Frankrigimiunik kissaammertitseqaaq allallumi aamma isornartorsiuipput.

Redingip assersuussinini ajuusaarutigigaluarlugu utoqqatserusunngilaq. Tunngaviusumillu isummernera kommisionip siulittaasuata taperserpaa EU-mi isumaqatigiissutinik atortitsiinnartoq oqaatigalugu.

Nunaarannguami Luxembourgimiuunera Frankrigimiunaasiit mitaatigaat. Frankrigimi nunanut allanut ministerip, Bernard Kouchnerip, nunanut allanut ministereqanni Luxembourgimiuusoq sianerfigivaa naalakkersuisut taama isumaqannginnerat qulakkeerumallugu.

Redingip isummernera Luxmbourgimiunut attuumassuteqanngilaq. Sarkozy-lli illaruaatiginnilluni Luxembourgimiut oqarfigai Romamiut tassani nunassitsiinnarsinnaagaat.

- Europami nunat angisuut nunallu mikisut taamatut imminnut pisassappata taava Europa ajornartorsiuteqarpoq, aallartitaq oqarpoq.

Ataatsimiinneq niueqatigiinneq pillugu eqqartuiffiusussaagaluartoq pisoq pillugu oqallittoqarneruvoq.

Nunat allat siuttui malunarsaanngeqaat Frankrigimmi anisitsinera Frankrigimut ajoqutaasinnaammat. Anisitsinermigummi ammip qalipaataanik immikkoortitsisutut isigineqalerpoq.

Danmarkip statsministeriata Lars Løkke Rasmussen-ip inatsisinik atortitsinermut kommisærip Viviane Redingip isornartorsiuinera ilalinngilaa. "Ataqqinnginninneruvoq" "nikassaanerullunilu" statsministeri Ritzau-imut oqarsimavoq.