Isikkamik arsaattartorsuup, nunanut allanut unammisartuni saassussisartuusimasup, brasiliamiup, Romario-p, isertitsisarnermi 1000-issaa qaammatini kingullerni anguniarsarisimavaa, ippassarlu kiisami iluatsitsilluni.
41-nik ukiulik taanna Brasiliami Vasco da Gamami arsaattartuuvoq, ippassarlu unammivaat Sport Recife, minutsillu 48-ssaanni strafferluni isertitseriarnermini 1000-issaa tassa isertitsivoq.
Romario 998-issaa qaammatit marluk sinnilaarlugit matuma siorna isertitsimmalli Vasco da Gamas-ikkut unamminissaannut billitsit tamarluinnarmik nunguttarsimapput. Romariolu 1000-issaa ippassaq isertitsimmat isiginnaartut tusagassiortullu katersuussimasut nuannattunnguusimapput.
Rio de Janeiromi arsaattarfimmi ippassaq unammineq minutsini 16-ini unitsinneqartariaqarsimavoq, aviisiliortut assiliisartullu arsaattartup 1000-issaanik isertitsinera pillugu oqaaseqartitsiniarnerisa nalaanni.
Romariolli inuusunnermini sungiusaatigalugu unammisarnermini isertitarisarsimasani ilanngullugit naatsorsorsimavai, taamaammat rekordiliinera una rekordiliisut allattorsimaffiannut allanneqarnavianngitsoq, Politiken allappoq.