Robert Petersen ataqqinaammik doktorinngorpoq

Robert Petersen Københavnip universitetiani 1972-imi eskimologi-mi professorinngorpoq, Ilisimatusarfimmilu 1987-imiit 1995-ip tungaanut rektoriulluni.

Robert Petersen inuup inuiaqatigiillu pissusiinik ilisimatusaatinik aamma oqaasilerinermut ilisimatusarnermik suliaqarsimavoq. Ilisimatuussutsikkut suliai qallunaatut tuluttut kalaallisullu saqqummersinneqartarsimallutik.

- Kalaallit Nunaanni universitet-imik pilersitsisutut, ilisimatuutut, ilinniartitsisutut ilisimasalittullu ingerlatitseqqiisarnera Kalaallit Nunaannut pingaaruteqarpoq, Robert Petersenip ataqqinaammik doktorinngortinneqarneranut atatillugu suleqatigiissitaq tunngavilersuutimini taama allappoq.

Ataqqinaammik doktorinngortitsinermi takussutissatut tunniunneqarpoq saqqarmioq kuultimik saanaaq, kuulti taanna Nunatsinninngaanneersuuvoq 14 karatiusorlu oqaatigineqarluni.