Risskovimi ajornartorsiuterpassuit
Risskov ilaatigut kalaallinut tarnimikkut nappaatilinnut aammalu tarnikkut misissugassanut 18-inut inissaqartitsivoq.
Risskovimi pissutsinik misissuineq maanna naammassineqarpoq, Morgenavisen Jyllandspostenilu naapertorlugu Tarnimikkut nappaatilinnut pineqaatissinneqarsimasunut katsorsaavimmi pissutsit arlallit isornarsiornissaannut pissutissaqartoq misissuinermi uppernarsarneqarpoq.
Nalunaarummi ilaatigut erseqqissarneqarpoq, sulisut ilaat - qulit missaanniittut - issuaaneq »napparsimasunut naleqqutinngitsumik pissuseqartartut nikassaarpaluttumillu oqaluttartut,« issuaaneq naavoq.
Katsorsaavimmi sulisut uninngasullu oqaatigaat, napparsimmavimmi oqaloqatigiinnermi oqaatsit sakkortuut atorneqartarnerat ileqquusoq aammalu inuit siorasaarisutut pissusilersortartut takussaakkajuttut.
Misissuinerup inernerata kalaallinut Risskovimi uninngasunut tunngasortaani ima allassimavoq:
- Uninngasut oqaatigaat sulisut ilaat inuppalaartuusut pitsaasumillu oqaluttartut, sulisulli ilaasa "naalakkersuerpaluttumik sakkortuumillu oqaluttartut" aamma oqaatigineqarluni.
Naak kalaallinut immikkoortortami sulisut arlallit marluinnik oqaaseqartuugaluartut oqaatsit aporfiusinnaasarneri uninngasunik katsorsaanermut akornutaasinnaasartut sulisunit aamma oqaatigineqarpoq.
Sulisuttaaq oqaatigaat uninngasut Kalaallit Nunaanni pinngortitamut kulturimullu atuumassuteqarnerat "katsorsaanermi ilanngunneqanngitsoortartoq".
Risskovimi kalaallinut immikkoortortaq taamaasilluni sulisut sumulluunniit attuumassuteqanngitsumik misissuiffigineqarnerini isornartorsiorneqarpallaanngilaq.
Per Jørgensenili, Region Jyllandimi tarnimikkut nappaatilinnik katsorsaanermut pisortaanerusoq oqaluttuarpoq, Risskovimi immikkoortortat allat misissuiffigineqarnerisa malitsigisaanik sulisut qulit missaanniittut soraarsinneqassasut, tarnimikkut nappaatilinnik sullissinissamut piumasaqaatinik naammassinninnginnerat pissutigalugu.
