RG pisortaanertaarpoq

Suliffissuaqarfiup Royal Greenland-ip pisortaanissaa maannamut Air Greenland-imi pisortaasoq Flemming Knudsen maajip aallaqqaataani atorfittaamminni aallartissaaq, ukiunilu sisamani atorfeqartussatut isumaqatigiissuteqarfigineqarpoq.

Royal Greenlandimi pisortaanertut toqqagaasup Fleming Knudsen-ip atorfittaassaminut aallartinnissani pissangageqaa sulilernissanilu qilanaaralugu oqarpoq. Suliffissuaqarfimmi pisortaagallartutut ivertinneqarsimasoq Paaviaaraq Heilmann upernaap ingerlanerani pisortatut atorfinitsinneqassasoq pisortaanissamiillu ilinniartuutigineqassalluni, Royal Greenland-ip siulittaasuanit Peter Grønvold Samuelsen-imit oqaatigineqarpoq.

Paaviaaqqap ilinniartuunissani pillugu oqarpoq siulersuisuunerit aalajangersimasaat ataqqillugu:

-Flemming Knudsen nunani allani niuernikkut pissutsinut ilisimasaqarluarpoq. Inuttaatalu malinnaafiginissaa pissanganarlunilu qilanaaraara, Paaviaaraq Heilmann oqarpoq.

Henrik Leth maannamut Royal Greenlandimi pisortatut atorfeqartoq atorfimminiilli tunuarniuteqartoq junip aallaqaataata tungaanut suleqataagallassaaq.

Ullormut taamatut neqeroorfigineqarneq naaggaarneqarsinnaanngitsutut Royal Greenland-imi pisortaaninngortussap nalilerpaa.

Kingullermik februar-imi ataatsimeersuartoqarmat

Flemming Knudsen siulersuisuunernut qinigaalluni ilaasortanngortinneqarpoq maannakkulli tassa suleqarfissuup pisortaaneratut atorfinitsinneqarluni:

- Sapaatit akunneri kingulliit uannut pissaganarsimaqaat, siulersuisuunernut qiningaanera pissuteqarpoq nunat tamat akornanni pissutsinnik ilisimasaqartuunera. Soorunami aamma pissutaaqataanngittuunngillat inuiaqatigiinnut suliniutit tunniussimasakka, soorunami naatsorsuutigisimanngikkaluarpara allamik atorfittaarnissara, eqqarsarluariaramali atorfik taanna aamma pissaganartillugu naameertuinnarsinnaasimanngilara.