RG-p qitiusumik DK-mi tunisassiorfeqalerusuppoq
Royal Greenlandip Danmarkimi qitiusumik tunisassiorfeqalernissaanik pilersaarutit piviusunngulerunarput. Inuussutissaqarnermut ministeri Hans Christian Schmidt pilersaarutinik soqutiginnippoq.
Royal Greenlandip Glyngøremi tunisassiorfia inuussutissaqarnermut ministerimit Hans Christian Schmidtimit marlunngormat takusarneqarpoq. Aalisakkanik tunisassiorfiup aalisakkanik ilisimatusarfiliornissamik pilersaarutaa takusaanermut pissutaavoq.
Glyngøremi tunisassiorfik ukioq kingulleq Polenimut annerusumik minnerusumilluunniit nuunneqarpoq. Tamatuma kingorna Royal Greenlandip tunisassiorfik inerisaqqillugu ilisimatusarfinngortinneqarsinnaasoq taaguuserlugu ”Det danske Seafood Center”-imik pilersaarutigaa.
Royal Greenlandip illoqarfimmi politikerinit tapersersorneqarnera malunnarluarpoq.
Jyllandip avannaanit, Region Nordjyllandimit, millioni koruunit aappaata affaanik isumassarsiaq taperneqarpoq. Tamannalu piviusunngortinneqarpoq suliffissuarmi pisortaanerup Keld Askærip, Sallingsundip Morsøp kommuneatalu qanimut suleqatigiinnerisigut.
Danmarkip iluani nunanilu allani suleqatigiilluni arlalinnik suliniuteqarnissaq siunertaavoq: siullermik nutaamik aalisakkanik tunisassiortoqassaaq. Limfjordillu eqqaani takornarianik suliffissuaq takuniariartinneqartassaaq. Nunanilu ineriartortuni aalisarnermik inuussutissarsiorneq atorluarneqarsinnaasunngorlugu ilisimatusartoqassalluni. Taakku saniatigut igasutut ilinniartoqartassaaq.
Inuussutissaqarnermut ministeri ajoraluartumik pilersaarut pillugu itinerusumik oqaaseqartissinnaanngilarput kommunit kattuffianni ataatsimeersuaqataanera pissutigalugu.
Morsøp borgmesteria aamma tassani ataatsimeeqataavoq. Glyngørimi ataatsimiinneq ajunngitsumik angusaqarfiusimavoq sukkanerpaarlu atorlugu aallartinneqarsinnaasoq Morsømi aviisi saqqummertoq naapertorlugu borgmesteri issuarneqarpoq.
- Upernaaru ilisimatusarfissaq aallarnisassavarput, Morsømi bormesteri Morsø Folkebladimut oqarpoq.
Tamatuma piviusunngornissaa paasinarsissaaq Morsimit Royal Greenlandimilu aallartitat qaammatip uuma naalernerani inuussutissaqarnermut ministerimit ataatsimeeqatiginnereerpata.
Royal Greenland naapertorlugu tunisassiorfik inerisaqqillugu ilisimatusarfinngortinneqarnera suliniutinit ataasiakkaanit aningaasalersorneqassaaq. Suliniutillu ukiut pingasut ingerlanerini 22,1 millioni koruuninik katilluni naleqassagatinneqarpoq.
